ဗင်းနစ်၏ နီဝင်ချိန်လား...

ဗင်းနစ်မြို့ရေ ကဗာကျော်မြို့တစ်မြို့ဖြစ်ပါရေ။ ထူးခြားရေ ချောင်းတိ၊ တူးမြောင်းတိက မြို့၏ နိန်ရာ အနှံ့ကို ဖြတ်သန်းစီးဆင်းနိန်လို့ ကကောင်းလှရေ မြို့တစ်မြို့ဖြစ်ပါရေ။ ရခိုင်ပြည်ကို ရောက်ရှိလာရေ ပေါ်တူဂီ ဘုန်းကြီး ဆဘက်ချန် မန်နရစ်က မြောက်ဦးမြို့ကိုလည်း အရှေ့တိုင်း၏ ဗင်းနစ် (The Venice of the East)လို့ တင်စားဖူးခပါရေ။ ယေကေလေ့ ဗင်းနစ်နန့် မြောက်ဦးမြို့ရေ တူရေ အချက်တိ ရှိရေပိုင် မတူရေ အချက်တိလည်း ရှိပါရေ။

ဗင်းနစ်မြို့ရေ အီတလီနိုင်ငံ၏ အရှေ့မြောက်ဘက်၊ မြေထဲပင်လယ်နားမှာ တည်ရှိရေ ကျွန်းစုမြို့ ဖြစ်ပါရေ။ အိမ်နေအိမ်ခြေတိကို ရီတိနန့် ၀ိုင်းနိန်တတ်လို့ မြို့သူမြို့သားတိ၏ အဓိက လမ်းပန်းဆက်သွယ်ရေးမှာ ဘုတ်တိ၊ သန်ဗန်တိ ဖြစ်ပါရေ။ ရုံးလားခြင်း၊ ကုန်တင်ကုန်ချလုပ်ခြင်း၊ အရေးပေါ်လူနာတင်ခြင်း စရေ နိတဓူဝလုပ်ငန်းတိအားလုံးနီးပါးကို လုပ်ဆောင်ဖို့ ရီလမ်းကြောင်းကို အားကိုးကတ်ရပါရေ။

ဗင်းနစ်မြို့လို့ နာမေမတင်ခင်က မြို့မှာ လူသူမနိန်ရေ ပင်လယ်ဝနားက ကျုပ်မြေ၊ နုန်းမြေတိ လူးကျံနိန်ရေ
ကျွန်းစုချေရာ ဖြစ်ပါရေ။ ပြည်မထဲကို အပြည်ပြည်က လာရောက်တိုက်ခိုက်သိမ်းပိုက်ကတ်တေခါ ယင်းကျွန်းစုချေတိကို လာပြီးကေ ခိုအောင်းနိန်ကတ်ယင်း တဖြည်းဖြည်း လူဦးရေ များလာပြီးကေ မြို့ရွာ သဏ္ဍာန်ကို ဆောင်လားခြင်းဖြစ်ပါရေ။ ယေကေလေ့ သူရို့မှာ မြို့ကြီးတစ်ခုအဖြစ် တည်ဆောက်ဖို့က စိန်ခေါ်မှု အများကြီး ရှိနိန်ခပါရေ။

ပင်လယ်ဝနားမှာ ရှိလို့ ဆငန်ရေရာ ပေါခြင်း၊ ရီချို ယှားပါးခြင်း၊ နိန်ထိုင်ဖို့ မြေထုမှာလည်း နုန်းမြေ၊ ကျုပ်မြေ ဖြစ်နိန်လို့ အဆောက်အဦး ဆောက်နိုင်လောက်အောင် အောက်ခြေခိုင်ခံမှု မရှိခြင်း၊ စိုက်ပျိုးမြေယှားပါးခြင်း စရေ စိန်ခေါ်မှု တပုံတခေါင်းကြီးကို ထိပ်တိုက်တွိကတ်ရပါရေ။ ဗင်းနစ်မှာ ယာယီနိန်ထိုင်ဖို့ရာ သင့်ပြီးကေ ရေရှည်နိန်ထိုင်ဖို့အတွက် ခက်နိန်ခပါရေ။ ရေရှည်နိန်ထိုင်နိုင်ဖို့အတွက်၊ မြို့ပြတည်ဆောက်နိုင်ဖို့အတွက် အင်ဂျီနီယာတိ၊ တတ်သိနားလည်ရေ ပုဂ္ဂိုလ်တိက ထိုပိုင်စမ်းသပ် အေပိုင်စမ်းသပ်နန့် နောက်ပိုင်းခါ အဖြေတိထွက်လာကတ်ပါရေ။

ပထမဆုံးအနေနန့် သစ်လုံးတိကို စိုက်ပါရေ။ ယင်းသစ်လုံးတိကို နုန်းမြေတိထဲကို ထိုးစိုက်ပါရေ။ နုန်းမြေ၊ ပျော့ရဲရေ သဲမြေတိကို ဖောက်လို့ အောက်ခံခိုင်ရေ သဲမြေကို ရောက်ရေအထိ စိုက်ကတ်ပါရေ။ တချို့နေရာမှာ သဲမြေကို ရောက်ဖို့ ဥပမာ- ၇ ပေ လိုရေပိုင် တချို့နေရာကျကေ ၇ ပေခွဲလောက် စိုက်ကတ်ရပါရေ။ (ဆောက်ဖို့ အဆောက်အဦးပေါ်မူတည်လို့ သစ်လုံးအရှည်အတို ကွာပါဖို့။) အေနေရာမှာ သံလုံးတိကို မသုံးပဲ သစ်သားလုံးကို သုံးရစွာ အကြောင်းကလည်း ရှိပါရေ။ သံလုံးတိရေ ပင်လယ်ဆငန်ရေနန့် ထိတွိပြီးကေ သံချီးလိုက်တိုက်စားလားနိုင်လို့ ရာသက်ပန်ခံနိုင်အောင် သစ်မာလုံးတိကို သုံးလားခြင်း ဖြစ်ပါရေ။ Alderလို့ခေါ်ရေ ဆောင်းရွက်ကြွီပင်တစ်မျိုး(ကချင်အခေါ် မိုင်ဗော်၊ နင်ဗော်၊ ယန်ဗော်)၏ ပင်စည်လုံးတိကို သုံးလားပါရေ။ ယင်းအထက်ကမှ beam အလွှာတစ်ထပ် တင်ပါရေ။ ပြီးကေ ရီတိုက်စားဒဏ်ကို ကောင်းကောင်းခံနိုင်ရေ စကျင်ကျောက်အလွှာကို တင်ပါရေ။ ယင်းအထက်ကမှ ကိုယ်ရို့ဆောက်ချင်စွာကို အုတ်တိနန့် ဆောက်လားပါရေ။

တတ်သိနားလည်ရေ ပညာသျှင်တိ၏ အမျိုးမျိုးစမ်းသပ်မှုတိကနိန် အဖြေရလားခြင်း ဖြစ်ပါရေ။ နောက်ပိုင်းမှာ ဗင်းနစ်ရေ မြို့ကြီးအဖြစ်ကို ချက်ချင်းပြောင်းလဲလားပါရေ။ ဒေသခံတိကလည်း ရီမှာ ကျွမ်းကျင်ကတ်လို့ ပြည်ပရန်တိကို ကာကွယ်နိုင်ပျာယ် တိုးတက်ထွန်းကား ခပါရေ။ နိန်ရာက အကျွန်ရို့ ပေါက်တောမြို့နယ်ထဲက တချို့နိန်ရာတိပိုင် ပင်လယ်ဝနားမှာ ဆားပြင်တိနန့်ဖြစ်လို့ ဆားအများကြီးထွက်ခပါရေ။ ယင်းဆားတိကို ယင်းသူရို့၏ ရီကြောင်းကျွမ်းကျင်မှုနန့် ပေါင်းစပ်ပနာ တခြားမြို့ရွာတိကို ကူးသန်းရောင်းဝယ်ယင်း စီးပွားရေးကုန်စည်စီးဆင်းရာ မြို့ကြီးဖြစ်လာပါရေ။ အရိဘက်က ပိုးထည်တိ၊ ဟင်းခတ်အမွှီးအကြိုင်တိ၊ ပုလဲတိ စရေ ကုန်ပစ္စည်းတိကို အနောက်ဘက်ကို တင်ပို့ယင်း ဗင်းနစ်မြို့ရေ ချမ်းသာတိုးတက်တေ မြို့ကြီး ဖြစ်လာပါရေ။ တရုတ်ပြည်ကို ရောက်လားရေ မာကိုပိုလိုရေ ဗင်းနစ်မြို့ခံ ကုန်သည်တစ်ဦး ဖြစ်ပါရေ။

ရီလမ်းကြောင်းတိက ဗင်းနစ်မြို့ခံတိကို အကျိုးပြုလို့ နှစ်စဉ်နှစ်တိုင်း ဗင်းနစ်မြို့၏ အုပ်ချုပ်သူရေ “အသင်ပင်လယ်၊ ငါရို့လက်ထပ်ပျာယ်။ ငါရို့၏ စိုးမိုးမှု အထိမ်းအမှတ်အဖြစ် အေလက်စွပ်ကို ပီးအပ်ပါ၏။” လို့ ဆိုပျာယ် ရွှေလက်စွပ်တစ်ကွင်းကို ရီထဲကို ၀ဲချတတ်ပါရေ။ အေဂုကတော့ ဗင်းနစ်မြို့ကို အကျိုးပြုရေ ရီပင်လယ်ကပဲ ဗင်းနစ်မြို့၏ ဆက်လက်တည်တံ့နိုင်ဖို့အရေးကို ခြိမ်းခြောက်စိန်ခေါ်နိန်ပျာယ် ဖြစ်ပါရေ။

ယင်းအထဲက အကြီးမားဆုံး စိန်ခေါ်မှုတစ်ခုကတော့ မြေမျက်နှာ နိမ့်ကျခြင်း ဖြစ်ပါရေ။ တည်ကတည်းက အောက်ခံမြေမှာ သဲကျောက်၊ သက်ရင့်ကျောက်တိခံထားရေ မြေမဟုတ်ပဲ ပင်လယ်ဝနားက နုန်းမြေ၊ သဲမြေဆိုခါ အထက်က အဆောက်အဦးအလီးချိန်တိက အောက်ကို ဖိယင်း ဖိယင်းနန့် ရီထဲကို နိမ့်ကျဝင်လာနိန်ပါရေ။ တချို့အဆောက်အဦးတိ၊ တာဝါတိဆိုကေ စောင်းကျလာနိန်ပါရေ။ အခြားတဘက်မှာလည်း ကဗာကြီးပူနွီးလာမှုကြောင့် ပင်လယ်ရီမျက်နှာပြင်က တဖြည်းဖြည်း တက်လာနိန်ပါရေ။ တချို့ပညာသျှင်တိက ပင်လယ်ရီမျက်နှာပြင် မြှင့်တက်မှုရေ လာဖို့ ဆယ်စုနှစ်တိမှာ ပိုမြန်လာနိုင်ရေလို့လည်း ခန့်မှန်း ပြောဆိုနိန်ကတ်ပါရေ။

ပင်လယ်ဆငန်ရေတိကရာ ဗင်းနစ်မြို့၏ အထက်ပိုင်း အုတ်ထည်တိကို ထိကေ ဆားဓတ်ကြောင့် အုတ်တိ ကြွီမွပျက်စီးလားပါဖို့။ အမြင်သာယာမှုတိအတွက်ရာမက အဆောက်အဦးတိ၏ ဘောင်ထည်ခိုင်ခံမှုတိ (structural integrity)အတွက်ပါ အများကြီး စိုးရိမ်ရပါရေ။ ပြည်သူတိ၏ အသက်အိုးအိမ်စည်းစိမ်တိအတွက် စိုးရိမ်ရပါရေ။ တဖက်မှာ- အမြဲတမ်း ပြန်လည် ပြုပြင်ဖို့စရိတ်တိက တခြား အီတလီပြည်မမှာ နိန်ထိုင်စရိတ်တိထက် အဆမတန် ကြီထွားလာကေ သာမန်ပြည်သူတိ အနိန်နန့် ဆက်နိန်နိုင်ကတ်ဖို့မဟုတ်ပါပျာယ်။ အေပိုင် စိန်ခေါ်မှုတိကို လက်ရှိ အီတလီနန့် ကဗာ့ပညာသျှင်တိက ရေရှည်ကျကျ ဇာပိုင်လုပ်ကတ်ဖို့လဲ၊ ကုန်ကျစရိတ် သက်သက်သာသာနန့် ဇာပိုင်ကိုင်တွယ်ဖြေယှင်းကတ်ဖို့လဲ ဆိုစွာကတော့ စိတ်ဝင်စားစရာပါ။ လောလောဆယ်တော့ ဗင်းနစ်မြို့၏ အနာဂတ်ကတော့ မသဲမကွဲ မရေမရာ ရှိနိန်ပါကြောင်း.....

A&E TV Channel၏ Ancient Mysteries: The Miraculous Canals of Venice မှတ်တမ်းဗီဒီယိုကို မှီငြမ်းသည်။