ကီရူးနာ

ဆွီဒင်နိုင်ငံ၏ မြောက်ဘက်စွန်းမှာ ကီရူးနာ(Kiruna)လို့ခေါ်ရေ မြို့တစ်မြို့ဟိပါရေ။ ယင်းမြို့၏ အောက်က သံသိုက်ရေ ကမ္ဘာ့အကြီးဆုံး သံသိုက်(iron ore)ကြီးတိထဲက တစ်ခုဖြစ်ပါရေ။ လူဦးရေ တစ်သောင်းရှစ်ထောင်ဝန်းကျင်ဟိရေ ယင်းမြို့၏ အဓိက စီးပွားရေးကတော့ သံသတ္တု တူးဖော်ရေးလုပ်ငန်းဖြစ်ပါရေ။ ဒုတိယကမ္ဘာစစ်ကဆိုကေ အေမြို့က သံတိကို ဂျာမနီပါးကို အမြောက်အမြား ရောင်းချခစွာကို တွိရပါရေ။ လွန်ခရေ နှစ်ပေါင်း ၁၁၀ ကျော်လောက် ယင်းသံသိုက်ကနိန်ပြီးကေ တန်ချိန်ကုဋေပေါင်းများစွာဟိရေ သံတိကို တူးလာကတ်စွာ အဂုဆိုကေ ယင်းမြို့မှာ အခက်အခဲကြီးနာင့် ရင်ဆိုင်နိန်ရပါရေ။ ဖြစ်ပုံက အေပိုင်ပါ။

သံသိုက်ကြီးရေ မြို့၏ အောက်တည့်တည့်မှာ တည်ဟိပါရေ။ ယေကေလေ့ ယင်းသံသိုက်ကြီး မြေအောက်အနက်မှာ ဇာပိုင်အနေအထားနာင့် တည်ဟိနိန်လဲဆိုစွာကို အယင်က မသိခပါ။ နောက်ခါမှ သံသိုက်ကြီးရေ မြေကြီးနာင့် ၆၀ ဒီဂရီ (အထက်ပုံပါအတိုင်း) အောက်ကို စောင်းပြီးကေ ဟိနိန်စွာကို သိကတ်ရပါရေ။

၆၀ ဒီဂရီစောင်းနိန်ရေ သံသိုက်ကို တူးယင်းနာင့် နောက်ပိုင်းမှာ ၆၀ ဒီဂရီစောင်းနိန်ရေ အပေါက်ကြီးတစ်ခုရာ ကျန်လိုက်ပါရေ။ ယေခါ အချိန်တန်ကေ ယင်းအပေါက်ကြီးထက်မှာ ဟိနိန်ရေ အိမ်တိ၊ မြို့တော်ခန်းမတိ၊ ရထားလမ်းတိ စရေ အဆောက်အအုံတိ ပြိုကျလာဖို့စွာကို စိုးရိမ်လာကတ်ရပါရေ။ မြို့ခံပြည်သူတိကလည်း ယင်းသတ္တုတူးဖော်ရေးကို မှီခိုနိန်ကတ်ရခါ ချက်ချင်းမပြောင်းနိုင် ဖြစ်ကတ်ရပါရေ။ အဂုဆိုကေတော့ တဖြည်းဖြည်းချင်း ပြောင်းလာနိန်ကတ်စွာကို တွိဟိရပါရေ။

အိမ်တိ၊ ဈီးဆိုင်တိ၊ နှစ်ပေါင်း၁၀၀ နီးပါးဟိရေ ဘုရားရှိခိုးကျောင်းကိုပါ ဘေးလွတ်ရာကို ပြောင်းနိန်ကတ်ရပါရေ။ ကီရူးနားမြို့ကို တည်ထောင်ခရေလူ၏ ၁၈၉၉ ခုနှစ်က ဆောက်ခရေ အိမ်ကိုလည်း မတတ်သာဘဲ ပြောင်းဖို့လုပ်ကတ်ရပါရေ။ မြို့၏အသက်သွေးကြောဖြစ်တေ ယင်းသံသိုက်ကြီးကတော့ ဆက်လက်လည်ပတ်ဆဲပါ။ မိမိရို့နိုင်ငံ၊ မိမိရို့မြို့က ထွက်ရေ သဘာဝအရင်းအမြစ်တိကို ဒေသခံမိသားစုတိက ဆက်လက်ခံစားကြရမည်သာ ဖြစ်သည်။

မှတ်ချက်။ National Geographic June 2010 အတွဲထဲက Town on the Moveဆိုရေ ဆောင်းပါးကို မှီငြမ်း ရွီးသားသည်။