နိုင်ငံသစ်များ

၁၉၉၀ ခုနှစ်နောက်ပိုင်းမှာ နိုင်ငံသစ် ၃၃ နိုင်ငံပေါ်ထွန်းလာပါရေ။ အများစုကတော့ ဆိုဗီယက်ပြည်ထောင်စုနန့် ယူဂိုဆလားဗီးယားနိုင်ငံပြိုကွဲမှု၏ အကျိုးဆက်ကြောင့် ဖြစ်ပါရေ။ ၁၉၉၁ခုနှစ်နောင်းပိုင်း ဆိုဗီယက်ပြည်ထောင်စုပြိုကွဲလို့ လပိုင်းအနည်းငယ်အတွင်းမှာပဲ နိုင်ငံပေါင်း ၁၅ နိုင်ငံက လွတ်လပ်ရေးကို ကြေညာလိုက်ကတ်ပါရေ။ ယင်းနိုင်ငံတိကတော့

၁။ အာမေးနီးယား
၂။ အဇာဘိုင်ဂျန်
၃။ ဘယ်လ်လာရုစ်
၎။ အက်စ်တုန်းနီးယား
၅။ ဂျော်ဂျယာ
၆။ ကာဇတ်စတန်
၇။ ကာဂျစ်စတန်
၈။ လတ်ဗီးယား
၉။ လီသူယမ်းနီးယား
၁၀။ မော်ဒိုဗာ
၁၁။ ရရှား
၁၂။ တာဂျစ်ကီစတန်
၁၃။ တာခ်မန်နီစတန်
၁၄။ ယူကရိန်း
၁၅။ အူစဘတ်ခ်ကစ်စတန် ရို့ဖြစ်ပါရေ။

ယူဂိုဆလားဗီးယားနိုင်ငံကနိန်ပြီးကေလေ့ ၁၉၉၀ ၀န်းကျင်နှစ်တိမှာ နိုင်ငံပေါင်း ၅ နိုင်ငံဖြစ်လားပါရေ။ (အဂုလက်ဟိမှာဆိုကေ နိုင်ငံ ၇ နိုင်ငံဖြစ်လားပါပျာယ်။) ဘော့စနီးယားနာင့် ဟာဇီဂိုးဗီးယားက ၁၉၉၂ ခုနှစ် ဖေဖော်ဝါရီလ ၂၉ ရက်နိန့်မှာလည်းကောင်း၊ ခရိုးယေးရှားက ၁၉၉၁ခုနှစ် ဂျုံလ ၂၅ရက်နိန်မှာလည်းကောင်း အသီးသီးနိုင်ငံအသစ်အဖြစ် ရပ်တည်လာကတ်ပါရေ။ မက်စီဒိုးနီးယားကလည်း ၁၉၉၁ ခုနှစ် စက်တင်ဘာလ ၈ ရက်နိန့်မှာ လွတ်လပ်ရေး ကြေညာခပါရေ။ ယေကေလေ့ ကုလသမဂ္ဂ က ၁၉၉၃ ခုနှစ်အထိ အသိအမှတ်မပြုခပါ။ ယင်းပိုင်ပျာယ် ရရှားနန့် အမေရိကန်ပြည်ထောင်စုရို့ကလည်း ၁၉၉၄ ခုနှစ် ဖေဖော်ဝါရီလကျမှ အသိအမှတ်ပြုခပါရေ။ ဆားဘီးယားနန့် မွန်တီနီဂရိုး ကလည်း ၁၉၉၂ခုနှစ် ဧပြီလ ၁၇ ရက်နိန့်၊ ဆလိုဗင်းနီးယားက ၁၉၉၁ ခုနှစ် ဂျုံလ ၂၅ရက် ရို့မှာ လွတ်လပ်သောနိုင်ငံအဖြစ် အသီးသီးကြေညာခကတ်ပါရေ။

(လွန်ခရေ ၂ နှစ်လောက်က ဖတ်လိုက်ရေရေ New York Timesသတင်းစာ ဆောင်းပါးတစ်ခုကိုလည်း အေနိန်ရာမှာ အလျဉ်းသင့်လို့ တင်ပြချင်ပါရေ။ အထက်ဖော်ပြခရေ နိုင်ငံတိထဲက နိုင်ငံနှစ်ခုအကြောင်းပါ။ ယင်းဆောင်းပါးအရ နိုင်ငံ ၂နိုင်ငံ ကွဲကတ်တေခါ စားသောက်ဆိုင်တစ်ဆိုင်ရေ ယင်းနှစ်နိုင်ငံကိုခွဲလိုက်တေ နယ်စပ်မျဉ်းကြောင်းထက်မှာ လားကျပါရေလတ်။ ဆိုင်၏ တစ်ပိုင်းက တစ်နိုင်ငံ၊ နောက်တစ်ပိုင်းက တစ်နိုင်ငံစီ ဟိနိန်ပြီးကေ ယင်းဆိုင်ထဲမှာပဲ နယ်စပ်မျဉ်းကို အနီရောင်နန့် တားထားပါရေလတ်။ ယင်းအနီရောင်လိုင်းနားမှာ နယ်စပ်စောင့်ကြပ်ရေးတပ်သားတချို့က ထိုင်စောင့်နိန်ကတ်ပါရေလတ်။ ပြဿနာက အရက်ဘား(bar)နန့် မီးဖိုချောင်က တစ်နိုင်ငံမှာ၊ ချဘောင်သာနန့် တချို့စားပွဲခုံတိက တစ်နိန်ရာမှာစီ ဟိနိန်ပါရေလတ်။ အထူးသဖြင့် ဘီယာသောက်ပြီးတိုင်း သီးပေါက်တတ်တေ လူတိက ချဘောင်သာတစ်ခါလားတိုင်း ယင်းနယ်စပ်အနီရောင်မျဉ်းကို ဖြတ်ရလို့ ပက်စ်ပို့ကို ထုတ်ထုတ်ပြကတ်ရရေလို့ New York Times သတင်းစာကြီးက ရွီးထားပါရေ။ ကကောင်းကို ကတ်သိကတ်ကျ ဖြစ်လီဖို့စွာကို စိုင်းစားယင်း စာရွီးသူလည်း ကောင်း ရယ်မိပါရေ။)

နောက်ထပ် နိုင်ငံပေါင်း ၁၃ နိုင်ငံကလည်း အကြောင်းကြောင်းကြောင့် လွတ်လပ်ရေး ရလာကတ်ပါရေ။
နမီးဘီးယားက ၁၉၉၀ခုနှစ် မက်ရ်ှလ ၂၁ ရက်မှာ တောင်အာဖရိက နိုင်ငံကနိန် လွတ်လပ်ရေး ရလားပါရေ။ ၁၉၉၀၊ မေ ၂၂ မှာ မြောက်နန့်တောင် ယီမင်နိုင်ငံရို့က စုပေါင်းယီမင်နိုင်ငံဖြစ်လားပါရေ။ ၁၉၉၀ အောက်တိုဘာ ၃ မှာ အဟြိဂျာမနီနန့် အနောက်ဂျာမနီပေါင်းပြီးကေ နိုင်ငံတစ်နိုင်ငံဖြစ်လားပါရေ။ ၁၉၉၁၊ စက်တင်ဘာ ၁၇ မှာ မားရှယ်ကျွန်းစုတိနန့် မိုက်ခရိုနီးရှား (ကယ်ရိုလိုင်း ကျွန်းစု)ရို့က အမေရိကန်ပြည်ထောင်စုထိန်းချုပ်ထားရေ ပစိဖိတ်ကျွန်းစုတိထဲကနိန်ပြီးကေ ကိုယ်ပိုင်နိုင်ငံတိဖြစ်လားပါရေ။ ၁၉၉၃၊ ဇန်န၀ါရီ ၁ ရက်မှာ ချက်ကိုဆလိုဗက်ကီးယားနိုင်ငံ ပြိုကွဲပြီးကေ ချက် ရပက်ပလိပ် နန့် ဆလိုဗားကီးယားနိုင်ငံအဖြစ် အသွင်ပြောင်းလားပါရေ။ အီသီယိုးပီးယားနိုင်ငံတစိတ်တပိုင်းဖြစ်တေ အီရီထရီးယားကလည်း ၁၉၉၃၊ မေလ ၂၅ ရက်နိန့်မှာ ခွဲထွက်ပြီးကေ နိုင်ငံသစ်တစ်နိုင်ငံ ဖြစ်လာပါရေ။ ၁၉၉၄၊ အောက်တိုဘာ ၁ မှာ ပလော ဒေသကလည်း အမေရိကန်ပြည်ထောင်စုထိန်းချုပ်ထားရေ ပစိဖိတ်ကျွန်းစုတိထဲက ထွက်ပြီးကေ ကိုယ်ပိုင်နိုင်ငံသစ်အဖြစ် ရပ်တည်လာပါရေ။

အရှေ့တီမောဒေသရေ ၁၉၇၅ ခုနှစ်မှာ ပေါ်တူဂီလက်ထဲကနိန်ပြီးကေ လွတ်လပ်သောနိုင်ငံအဖြစ် ကြေညာခပါရေ။ ယေကေလေ့ ၂၀၀၂ခုနှစ် မေလ ၂၀ရောက်ခါမှ အင်ဒိုနီးရှားလက်ထဲကနိန် လွတ်မြောက်လားပြီးကေ နိုင်ငံသစ်တစ်နိုင်ငံ ဖြစ်လာပါရေ။ ၂၀၀၆ ခုနှစ် ဂျုံလမှာ ယခင်ဆားဘီးယားနန့် မွန်တီနီဂရိုးနိုင်ငံက မွန်တီနီဂရိုး သတ်သတ်တစ်နိုင်ငံ၊ ဆားဘီးယား သတ်သတ်တစ်နိုင်ငံ ဖြစ်လာပါရေ။ လူထုဆန္ဒကောက်ခံမှု၏ ရလဒ်အပေါ်မှာ ကြည့်ပြီးကေ ဆုံးဖြတ်ခွဲထွက်လိုက်ကတ်စွာ ဖြစ်ပါရေ။ နောက်ဆုံးအနိန်နန့် လွတ်လပ်ရေး ကြေညာရေနိုင်ငံအသစ်ဆုံးကတော့ ဆားဘီးယားက ၂၀၀၈၊ ဖေဖော်ဝါရီလ ၁၇ ရက်နိန့်မှာ ခွဲထွက်လိုက်တေ ကိုဆိုဗို ဒေသဖြစ်ပါရေ။

အခုလက်ဟိအနိန်နန့် နောက်ထပ်နိုင်ငံသစ်တစ်ခုလည်း မကြာခင်အတွင်းမှာ ပေါ်ပေါက်လာနိုင်ပါပျာယ်။ ခရစ်ယာန်တိနိန်ထိုင်ရေ ဆူဒန်တောင်ပိုင်းက မူဆလင်အာရပ်တိနိန်ရေ မြောက်ပိုင်းက ခွဲရေး၊ တွဲရေးကို လူထုဆန္ဒ ကောက်ခံယူနိန်ပျာယ် ဖြစ်ပါရေ။ နှစ် ၅၀ ကျော် ပြည်တွင်းစစ်ကြောင့် လူပေါင်း၂ သန်းကျော် သီဆုံးပြီးရေ နောက်မှာ ဆူဒန်နိုင်ငံ၏ အနာဂတ် ပြောင်မြောက်တောက်ပြောင်ဖို့အတွက် လူထုကြီး၏ အခွင့်အရေးပဲ ဖြစ်ပါရေ။ ကမ္ဘာ့အဆိုးရွားဆုံးအာဏာရှင်စာရင်းဝင် အိုမာ အယ်လ် ဘချီယာ ကလည်း ယင်းလူထုဆန္ဒကို အသိအမှတ်ပြုဖို့လို့ ကတိပြုထားပါရေ။ ယင်းကတိကို တည်မတည်ကိုလည်း ကမ္ဘာတ၀ှမ်းက အနီးကပ်စောင့်ကြည့်နိန်ကတ်ပါပျာယ်။ အမေရိကန်သမ္မတ ဘရတ်အိုဘားမားကလည်း 'ဆန္ဒခံယူပွဲအောင်မြင်ရေးသည် အာဖရိက၏ ရှည်လျားလှစွာသော ဒီမိုကရေစီနန့်တရားမျှတရေး ခရီးလမ်းအတွက် အားတက်စရာ၊ ဂုဏ်ယူဝမ်းမြောက်စရာတစ်ခု ဖြစ်လာပါလိမ့်မည်' New York Timesသတင်းစာကြီးမှာ ရွီးသားလိုက်ပါရေ။ အာဖရိကတိုက်အတွက်သာမက ကမ္ဘာတ၀ှမ်းလုံးဟိ ဖိနှိပ်ခံပြည်သူ၊ လူမျိုးတိအတွက်လည်း အားတက်ကျေနပ်စရာတစ်ခုပင် မဟုတ်ပါလာ။

ကဲ...ကျနော်ရို့အလေ့ ဇာခါရောက်ဖို့လဲ...

1. Rosenberg, Matt., New Countries of the World, http://geography.about.com/cs/countries/a/newcountries.htm, accessed January 9, 2010.
2. The Associated Press, "Obama: World is watching Sudan referendum", http://www.washingtonpost.com/wp-dyn/content/article/2011/01/09/AR2011010901329.html, accessed on January 9, 2010