ငှက်တုပ်ကွေး ရောဂါ

ရခိုင်ပြည် စစ်တွေမြို့မှာ အပြင်းစား"ကြက်ငှက်တုပ်ကွေး" သို့မဟုတ် "ကြက်တုပ်ကွေး"ရောဂါ ဖြစ်ပွားနိန်ရေ ဆိုပြီးကေ သတင်းတိမှာ ကြားနိန်ရပါရေ။ ယင်းရောဂါနန့် ပတ်သက်ပြီးကေ သိကောင်းစရာချေတိကို ရွီးသားလားဖို့ ဖြစ်ပါရေ။ ယေကေလေ့ ယင်းချင့်ကို မရွီးခင် ရောဂါနာမေနန့် ပတ်သက်ပြီးကေ ပြောစရာက ဟိလာပါရေ။ အင်္ဂလိပ်စာအရ Bird Fluလို့ခေါ်ရေ ငှက်တုပ်ကွေးရောဂါကို ပြည်တွင်း၊ပြည်ပ ဗမာစာနယ်ဇင်းဌာနတိမှာ "ကြက်ငှက်တုပ်ကွေးရောဂါ"လို့တမျိုး၊ "ကြက်တုပ်ကွေးရောဂါ"လို့ တဖုံ သုံးစွဲနိန်ကတ်ပါရေ။ လူတိနားလည်အောင် "ကြက်"လို့ ထည့်ပြီးကေ ခေါ်ဝေါ်နိန်ကတ်စွာ မှန်ကေလေ့ ရောဂါဆိုင်ရာ သိပ္ပံတွေ့ဟိချက်တိနန့်က လွဲနိန်ပါရေ။ ယေပြီးကေ လူတိအသိမှာ အေရောဂါရေ ကြက်မှာရာ ဖြစ်တတ်တေလို့ အထင်ဟိလားစီပါရေ။ တနည်းအားဖြင့် စာဖတ်သူကို လွဲမှားရေ အချက်အလက်ပီးရေ သဘောရောက်လားနိုင်လို့ ဘာသာပြန်သူတိုင်း ဆင်ခြင်သင့်ပါရေ။ ယင်းအသုံးအနှုန်းကို ဆင့်ထက်မျှဝီပီးသူတိအနိန်နန့်လည်း ဆင်ခြင်သင့်ပါရေ။ တကယ့်ဇစ်မြစ်ကို သိအောင်ကြိုးစားသင့်ပါရေ။

ကြက်ရေ ငှက်အုပ်စုထဲမှာ ပါပါရေ။ ယင်းပိုင်ပျာယ် ဘဲ၊ ကြက်ဆင်စရေ တိရစ္ဆာန်တိလည်း ငှက်အုပ်စုထဲမှာပါပါရေ။ အေရောဂါကို ဖြစ်စီရေ avian influenza A ဗိုင်းရပ်စ်တိဆိုစွာလည်း ကြက်ထဲမှာသာ မဟုတ်ပဲ တခြားငှက်မျိုးနွယ်တိဘားကိုလည်း ကူးစက်ပြန့်ပွားပါရေ။ Avian ဆိုစွာ ငှက်လို့ အဓိပ္ပာယ်ရပြီးကေ influenza ဆိုစွာ တုပ်ကွေးလို့ အဓိပ္ပာယ် ရပါရေ။ အေဗိုင်းရပ်စ်ကို သဘာဝအလျောက်ငှက်တိမှာ တွိရပါရေ။ နယ်ခြားမြီခြား ပျံနိန်ကတ်တေ ငှက်တိရေ ယင်းဗိုင်းရပ်စ်ပိုးကို သူရို့၏ အူလမ်းကြောင်းထဲမှာ သယ်ဆောင်လားတတ်ပါရေ။ သူရို့ကိုယ်တိုင်က ယင်းဗိုင်းရပ်စ်ကို ကြံ့ကြံ့ခံနိုင်ကေလေ့ ယင်းရောဂါပိုးက အိမ်မွီးတိရစ္ဆာန်ငှက်တိ(ဥပမာ-ကြက်၊ဘဲ)ကို အလွယ်တကူကူးစက်နိုင်ပြီးကေ ယင်းငှက်မျိုးတိကို အလွန်အမင်း နိန်ထိုင်မကောင်းဖြစ်စီပါရေ။ တချို့ဆိုကေ သီလားကတ်ရပါရေ။ ယင်းအတွက်ကြောင့် သိပ္ပံနည်းကျမှန်ကန်မှုအပေါ်မှာ အခြေခံပြီးကေ ငှက်တုပ်ကွေးရောဂါလို့ရာ ခေါ်ဝေါ်သင့်ပါရေ။ တဒင်္ဂလွယ်ကူမှုအတွက် ပြည်သူတိကို အချက်အလက်အမှားတိကို မဖြန့်ဝီသင့်ပါ။

ငှက်တိအချင်းချင်း ဇာပိုင်ကူးစက်လဲ
Avian Influenza Aဗိုင်းရပ်စ် ကူးစက်ခံထားရရေ ငှက်တိရေ ယင်းဗိုင်းရပ်စ်ပိုးကို သူရို့၏ တန်းဆွီး(တံတွေး)၊ နှာခေါင်းချီး၊ ကျင်ကြီးတိကနိန် အပြင်လောကကို ထုတ်ချပါရေ။ ယင်းအညစ်အကြေးတိနန့် တိုက်ရိုက်သော်လည်းကောင်း၊ ယင်းအညစ်အကြေးတိဟိနိန်ရေ အရာဝတ္ထု၊ မျက်နှာပြင်တိနန့် သော်လည်းကောင်း လားထိရေ ငှက်တိရေ ယင်းရောဂါပိုးကူးစက်ခြင်းကို ခံရကတ်ပါရေ။ အိမ်မွီးတိရစ္ဆာန်ငှက်တိကတော့ ယင်းဗိုင်းရပ်စ်ပိုးကို သူရို့သုံးရေ အစာ၊ ရီတိကသော်လည်းကောင်း၊ ကူးစက်ပိုးပါရေ မြီသား၊ လှောင်ခြံစရေ မျက်နှာပြင်တိကသော်လည်းကောင်း၊ တခြားကူးစက်ခံထားရရေ တိရစ္ဆာန်ငှက်တိကသော်လည်းကောင်း ရဟိလားတတ်ပါရေ။

ယင်းပိုင်ကူးစက်လားရေ နောက်မှာ အိမ်မွီးတိရစ္ဆာန်(ကြက်၊ ဘဲ)တိအနိန်နန့် အကျိုးဆက်နှစ်မျိုးကို ခံစားလာနိုင်ပါရေ။ တစ်မျိုးက အသေးစား ကူးစက်မှုနန့် နောက်တစ်မျိုးက အပြင်းစားကူးစက်မှုပါ။ အသေးစားကူးစက်မှုကြောင့် ရောဂါလက္ခဏာချေတိကို တွိရပါဖို့။ ဥပမာ - ဥထွက်နှုန်း ကျဆင်းခြင်း၊ ငှက်အမွီးတိ စင်းလို့ကျမနိန်ပဲ ဖရိုဖရဲဖြစ်နိန်ခြင်းစရေ လက္ခဏာတိကို တွိရနိုင်ပါရေ။ ခန္ဓာကိုယ်အတွင်းအင်္ဂါရပ်တိ ကူးစက်ခံရပျာယ်ဆိုကေတော့ အပြင်းစားအဆင့်ကို ရောက်ဟိလားပြီးကေ ၄၈ နာရီအတွင်းမှာပဲ ကူးစက်ခံရရေ ငှက်တိ၏ ၉၀ ကနိန် ၁၀၀ ရာခိုင်နှုန်း သီဆုံးလားနိုင်ပါရေ။

ဗိုင်းရပ်စ်မျိုးစိတ်
အေဗိုင်းရပ်စ် A အမျိုးအစားထဲမှာပဲ တခြား မျိုးစိတ်ချေတိ ဟိပါသိရေ။ ယင်းမျိုးစိတ်တိရေ ယင်းဗိုင်းရပ်စ်မျက်နှာပြင်မှာ ဟိရေ HA, NA ပရိုတင်းနှစ်မျိုးအပေါ်မှာ မူတည်ပြီးကေ ကွဲပြားပါရေ။ လောလောဆယ် သိဟိထားရေ HA မျိုးစိတ်ကွဲ ၁၆ မျိုးနန့် NAမျိုးစိတ်ကွဲ ၉ မျိုးဟိပါရေ။ ယင်းHAနန့် NAပေါင်းစပ်ပြီးကေလေ့ မျိုးစိတ်ကွဲသစ်တိ ဖြစ်ပေါ်လာတတ်ပါရေ။

လူတိသို့ ကူးစက်ခြင်း
လူတစ်ယောက်ကနိန် နောက်တစ်ယောက်ကို အေရောဂါကူးစက်တတ်တေဆိုစွာကတော့ ကကောင်းရှားပါရေ။ ယေကေလေ့ အေတုပ်ကွေးဗိုင်းရပ်စ်တိရေ အမြဲတမ်းပြောင်းလဲတတ်ပါရေ။ လောလောဆယ်မှာ လူအချင်းချင်း မကူးစက်နိုင်ကေလေ့ နောင်တချိန်မှာ ယင်းဗိုင်းရပ်စ်သဏ္ဍန်ပြောင်းလဲပြီးကေ မကူးစက်နိုင်လို့ ပြောလို့မရပါ။

တုပ်ကွေးလက္ခဏာနန့် ရောဂါရှာဖွေခြင်း
ကူးစက်ခံရရေ လူတိ ကြုံတွိရရေ လက္ခဏာတိကတော့ သာမန်တုပ်ကွေးလက္ခဏာတိနန့် ဆင်ပါရေ။ ဥပမာ - အဖျားတက်ခြင်း၊ ခြောင်းဆိုးခြင်း၊ လိုင်ဖားနာခြင်း၊ ကြွက်သားကိုက်ခဲခြင်း၊ မျက်စိနာခြင်းစရေ ဝေဒနာတိကို ခံစားရနိုင်ပါရေ။ ယင်းအပြင် ညူမိုးနီးယား(အဆုတ်ရောင် အဖျား)နန့် အသက်အန္တရာယ်ကို ခြိမ်းခြောက်နိုင်ရေ လက္ခဏာတိကိုလည်း ခံစားကောင်း ခံစားနိုင်ပါရေ။

ခံစားနိန်ရရေ တုပ်ကွေးရေ ဇာတုပ်ကွေးလဲ၊ ငှက်တုပ်ကွေးလား ဆိုစွာကို သိဟိနိုင်ဖို့အတွက် နိန်ထိုင်မကောင်း ဖြစ်ပြီး ရက်ပိုင်းအတွင်းမှာ ယင်းလူ၏ လိုင်ခေါင်းထဲကိုပဲဖြစ်ဖြစ်၊ နှာခေါင်းထဲကိုပဲဖြစ်ဖြစ် ဂွမ်းစချေထိုးထည့်ပနာ ယင်းဂွမ်းစကို ဓာတ်ခွဲခန်းကို ပို့လို့ စစ်ဆေးရပါရေ။ တကယ်လို့ ဖြစ်စွာကြာလို့ ရောဂါနည်းနည်း ကျွမ်းလာပျာယ် ဆိုကေတော့ အထက်ဖော်ပြပါနည်းနန့် စမ်းသပ်လို့ မရပါပျာယ်။ ယင်းခါကျကေ ခန္ဓာကိုယ်က ဗိုင်းရပ်စ်ကို ဇာပိုင်တုံ့ပြန်လဲအပေါ်မှာ မူတည်ပြီးကေ ဆုံးဖြတ်ရဖို့ဖြစ်ပါရေ။

ဇာပိုင်ကူးသကတ်ဖို့လဲ
ပြုလုပ်ခရေ ဆီးဖက်ဆိုင်ရာ သုတေသနတိအရ သာမန်တုပ်ကွေးဆီးတိနန့် ငှက်တုပ်ကွေးရောဂါခံစားသူရို့ကို ကုသကေလေ့ ကောင်းတတ်တေလို့ ဆိုပါရေ။ ယေကေလေ့ အမြဲတမ်းကောင်းရေလို့တော့ အတတ်ပုံသီ ပြောလို့မရပါ။ လူနာမှာ ဟိနိန်ရေ ဗိုင်းရပ်စ်အမျိုးအစားအပေါ်မူတည်ပါဖို့။ ပြီးကေ အထက်မှာဖော်ပြခရေပိုင် ဗိုင်းရပ်စ်တိရေ အမြဲတမ်းပြောင်းလဲနိန်တတ်လို့ ပထမတစ်ခါ ရိုးရိုးတုပ်ကွေးဆီးနန့် ကောင်းလခကေလေ့ နောက်တစ်ခါ ကောင်းချင်မှ ကောင်းပါဖို့။ အခြားတစ်ဘက်မှာ ဟိနိန်ရေ ဗိုင်းရပ်စ်ကလည်း ရိုးရိုးတုပ်ကွေးဆီးကို ထုံလားပျာယ်ဆိုကေလေ့ ရောဂါပျောက်ဖို့မဟုတ်ပါ။ ယင်းအတွက်ကြောင့် ကာကွယ်ခြင်းရေ ကုသခြင်းထက် ပိုထိရောက်၏ ဆိုရေပိုင် ကြိုတင်မဖြစ်အောင် ကာကွယ်ထားလီ အကောင်းဆုံးပါပျာယ်။

အပြင်စားငှက်တုပ်ကွေး
အပြင်စားငှက်တုပ်ကွေးမျိုးကို HPAI H5N1လို့ခေါ်ရေ ဗိုင်းရပ်စ်က ဖြစ်ပွားစီနိုင်ပါရေ။ ယင်းဗိုင်းရပ်စ်ရေ ကူးစက်ဖို့ အလွန်လွယ်ကူပြီးကေ ငှက်တိကို သီစီနိုင်လောက်အောင် ပြင်းပါရေ။ အထူးသဖြင့် အိမ်မွီးတိရစ္ဆာန် ကြက်၊ ဘဲတိအတွက် စိုးရိမ်စရာပါ။ ယင်းဗိုင်းရပ်စ်ရေ လူတိကို ကူးစက်ခဲပါရေ။ ယေကေလေ့ ကူးစက်ဖူးရေ သာဓကချေတိလည်း ဟိပါရေ။ အထူးသဖြင့် ယင်းဗိုင်းရပ်စ်ဟိရေ ငှက်တိနန့် တိုက်ရိုက်ထိတွေ့ခီရေ လူတိမှာ ဖြစ်တတ်ပါရေ။

အာသျှတိုက်၊ အာဖရိကတိုက်နန့် ဥရောပတိုက်တချို့ဒေသတိမှာ လူတချို့ ယင်းဗိုင်းရပ်စ်ပိုး ကူးစက်ခံခကတ်ရပါရေ။ ကူးစက်ခံရရေလူတိ၏ ၆၀ ရာခိုင်နှုန်း သီဆုံးကတ်ရပါရေ။ ယင်းအတွက်ကြောင့် အေဗိုင်းရပ်စ်ရေ ကူးစက်ခဲကေလေ့ ကူးစက်ခံရပျာယ်ဆိုကေ ကောင်း အန္တရာယ်များရေ ပိုးတစ်မျိုးဖြစ်ပါရေ။

လူအချင်းချင်းကူးစက်ဖူးရေ သာဓကတိ ဟိပါရေ။ ၂၀၀၄ ခုနှစ်က ထိုင်းနိုင်ငံက မိသားစုတစ်စုမှာ နိန်ထိုင်မကောင်းဖြစ်နိန်ရေ အချေကနိန် ယင်းအချေကို အနီးကပ်တပူးတွဲလွဲ ပြုစုနိန်ရေ မိခင်ဘားကို ကူးစက်လားစွာကို တွိခရပါရေ။ ယင်းပိုင်ပျာယ် အင်ဒိုနီးရှားနိုင်ငံမှာလည်း ၂၀၀၆ ခုနှစ် ဂျုံလက ယင်းပိုင်ကူးစက်မှုတစ်ခု ဖြစ်ပွားခပါရေ။ ကူးစက်ခံထားရရေ ကြက်ကနိန်တဆင့် ပထမဆုံးလူတစ်ယောက်ကို ကူးပါရေ။ ယင်းကနိန် တခြားမိသားစုဝင် ၇ ယောက်ကို ထပ်ကူးခပါရေ။

HPAI H5N1ဗိုင်းရပ်စ်ပိုးကို ကုသဖို့အတွက် Oseltamivirနန့် Zanamivir ဆိုရေ ဆီးဝါးနှစ်မျိုးကို သုံးတတ်ကတ်ပါရေ။ World Health Organization (WHO)ကတော့ Oseltamivirကို ပိုအသုံးတေ့ရေလို့ ဆိုထားပါရေ။ ယင်းပိုင်ပျာယ် တခြားဆီးဝါးတိလည်း ဟိပါရေ။

နှာခေါင်းဖုံးစွပ်ထားခြင်းက ဇာလောက်ကာကွယ်နိုင်လဲ
လောလောဆယ်မှာ ငှက်တုပ်ကွေးရောဂါကာကွယ်ဖို့အတွက်က နှာခေါင်းဖုံးစွပ်ရဖို့လို့ ကျွမ်းကျင်သူတိက အကြံမပီးထားပါသိ။

ကြက်၊ ဘဲတိ၊ ကြက်ဥ၊ ဘဲဥတိ စားကေ ကူးစက်နိုင်လာ
သန့်သန့်ရှင်းရှင်းလုပ်ကိုင်ပျင်ဆင်ထားရေ ကြက်သားဘဲသား၊ ကြက်ဥဘဲဥတိစားလို့ ငှက်တုပ်ကွေးရောဂါမဖြစ်နိုင်ပါလို့ အမေရိကန် ရောဂါကာကွယ်ထွန်းချုပ်ရေးဌာနကြီး (CDC) ဆိုပါရေ။ ယေကေလေ့ ရခိုင်ပြည်မှာ ကြက်သားရောင်းပုံ၊ ၀ယ်ပုံနန့် အမေရိကားမှာ ရောင်းပုံ၊ ၀ယ်ပုံမတူပါ။ ဥပမာ-အမေရိကမှာရောင်းရေ ကြက်သားတိကို packageလုပ်ပြီးကေ ရောင်းပါရေ။ ကြက်ခြံကို ထိန်းသိမ်းပုံ၊ ကြက်တိကို သတ်ပုံ၊ ရှင်းပုံ စနစ်တကျ သတ်မှတ်ထားရေ အဆင့်တိဟိပါရေ။ ဆိုလိုစွာက ပိုပြီးကေ သပ်ယပ်မှု ဟိပါရေ။ တကယ်လို့ ကူးစက်ပိုးပါရေ ယင်းကြက်သားကို စားမိလို့ နိန်မကောင်းဖြစ်ကေတောင်မှ ယင်းအထုပ်မှာ ပါရေ ဘားကုတ်(bar code)နန့်သက်ဆိုင်ရာ တံဆိပ်တိကို လိုက်(trace)ကြည့်လိုက်ကေ ယင်းကြက်သားရေ ဇာပြည်နယ်၊ ဇာမြို့၊ ဇာကြက်ခြံ၊ ဇာခြံနံပါတ်ကလည်း ဆိုစွာကို သိနိုင်ပါရေ။ ယင်းမြို့၊ ယင်းရပ်ကွက်မှာ ဟိရေ ကြက်အားလုံးကို သတ်စရာမလိုပဲ ပိုးပါရေ ခြံက ကြက်ကို သတ်ရုံပါပျာယ်။ သေချာအောင် တခြားအနီးအနားခြံက ကြက်တိကို စမ်းသပ်ကြည့်ပြီးကေ ရောဂါပိုးတွိက ဆက်သတ်နိုင်ပါရေ။ ကြက်ခြံပိုင်ရှင်အတွက်လည်း ဆုံးရှုံးမှုနည်းအောင် ထိန်းချုပ်နိုင်ပါရေ။

ရခိုင်ပြည်၊ ဗမာပြည်မှာကျကေတော့ခါ စားလို့ရရေလို့ သေချာပြောလို့မရပါသိ။ ကြက်ရောင်းရေလူက ရောဂါပိုးဟိမှန်းမသိလို့ ရောင်းမိလို့သော်လည်းကောင်း၊ ရောဂါပိုးဟိမှန်းသိယင်းနန့် အလကားဝဲပလိုက်ရဖို့စွာကို နှမြောလို့သော်လည်းကောင်း ရောဂါပိုးဟိရေ ကြက်တိရေ ဈီးကွက်ထဲကို ရောက်လာနိုင်ပါရေ။

ဇာပဲဖြစ်ဖြစ် ကာကွယ်လို့ရရေ နည်းလမ်းချေတိကို သိထားဖို့ လိုအပ်ပါရေ။
၁။ ကြက်သား၊ ဘဲသား၊ ကြက်ဥ၊ ဘဲဥတိကို မကိုင်ခင်နန့် ကိုင်ပြီး စက္ကန့် ၂၀ အကြာတိုင်း လက်ကို သပုန်၊ ရီနွီး(warm water)တိနန့် ဆီးကြောသင့်ပါရေ။
၂။ ကြက်သား၊ ဘဲသား၊ ကြက်ဥ၊ ဘဲဥတိ ထိတွိခရေ မျက်နှာပြင်တိ၊ ခုတ်လီးရေ စိုင်းသီတုန်းတိ၊ ဓားတိစရေ ကိရိယာတိကိုပါ ရီပူနန့် သပုန်နန့် ဆီးကြောသင့်ပါရေ။
၃။ ကြက်ဥ၊ ဘဲဥတိကို ပြုတ်စားဖို့ဆိုကေ အထဲက အ၀ါနှစ်နန့် အကာဖြူထည် ကျက်မာရေအထိ ပြုတ်သင့်ပါရေ။
၎။ ကြက်သား၊ ဘဲသားတိကို ချက်ရေအခါမှာလည်း မီးပြင်းပြင်း(အပူချိန် ၇၅ ဒီဂရီစင်တီဂရိတ် သို့မဟုတ် ၁၆၅ ဖာရင်ဟိုက်ထိ)နန့် လုံးဝကျက်ရေအထိ ပြုတ်ချက်ပြီးမှ စားသုံးသင့်ပါရေ။

လူနန့်ငှက်အပြင် တခြားဇာတိရိစ္ဆာန်တိကိုလည်း ရောဂါပိုးပြန့်နိုင်လဲ
ငှက်တုပ်ကွေး ရောဂါပိုး H5N1ကို လူနန့်ငှက်အပြင် တခြား ၀က်၊ ကျား၊ ကျားသစ်၊ ကြောင်စရေ တိရစ္ဆာန်တိမှာလည်း တွိရပါရေ။ ယင်းတိရိစ္ဆာန်တိရေ ကူးစက်ခံထားရရေ ငှက်သီတိကို စားခြင်းကနိန်တဆင့် ကူးစက်ကတ်တေလို့ သိရပါရေ။ ၂၀၀၃၊ ၂၀၀၄ ခုနှစ်တိက အာသျှတိုက်မှာ ဖြစ်ခရေ ငှက်တုပ်ကွေးရောဂါပြန့်ပွားကာလက ကြောင်တိမှာပါ ကူးစက်ပြီးကေ သီဆုံးကတ်တေလို့ သတင်းတချို့အရ သိရပါရေ။ နယ်သာလန်နိုင်ငံမှာ ပြုလုပ်ခရေ စမ်းသပ်မှုတစ်ခုကလည်း ကြောင်တစ်ကောင်ကနိန် နောက်တစ်ကောင်ကို ငှက်တုပ်ကွေးရောဂါကူးစက်ပြန့်ပွားနိုင်ရေလို့ ပြောဆိုခပါရေ။ အခုအချိန်ထိတော့ ကူးစက်ခံထားရရေ ကြောင်ကနိန် လူဘားကို ကူးစက်ရေဆိုရေ အဖြစ်အပျက်တော့ မတွိရပါသိ။

တုပ်ကွေးဆိုရေ ရောဂါမျိုးရေ နှစ်စိုင်ဖြစ်တတ်တေ အမျိုးပါ။ ယင်းပိုင်ပျာယ် ငှက်တုပ်ကွေးဆိုစွာလေ့
အိမ်မွီးတိရစ္ဆာန်တိမှာ နှစ်စိုင်ဖြစ်နိုင်ပါရေ။ ယင်းအတွက်ကြောင့် သက်ဆိုင်ရာ မွေးမြူရေးသမားတိအနိန်နန့် အထူးဂရုပြုသင့်ပါရေ။ ငှက်တုပ်ကွေးနန့် တခြားတုပ်ကွေးရောဂါ ဗိုင်းရပ်စ်တိရေ ယင်းရို့ရောက်ဟိရာ နိန်ရာကိုလိုက်ပြီးကေ အမြဲတမ်းပြောင်းလဲနိန်တတ်ပါရေ။ တကယ်လို့ ယင်းဗိုင်းရပ်စ်က ပြောင်းလဲပြီးကေ လူတိကြားမှာ အလွယ်တကူ ကူးစက်နိုင်ရေ ဗိုင်းရပ်စ်သဏ္ဍာန်ဖြစ်လားခကေ pandemic (ကမ္ဘာ့အနှံ့ ပြန့်ပွားရေ ရောဂါ)အဆင့်ကို အလွယ်တကူရောက်ဟိလားနိုင်ပါရေ။ အသစ်ပြောင်းလဲဖြစ်လာရေ ယင်းဗိုင်းရပ်စ်ကို လက်ဟိဆီးဝါးတိကလည်း ကုလို့ ရချင်မှ ရပါဖို့။ ဆီးဝါးအသစ်ကို ပညာရှင်တိက အပြင်း စမ်းသပ်တီထွင် ကတ်ရပါဖို့။

Pandemicကြောင့် ဖြစ်ပေါ်လာဖို့စွာကို ဇာနိုင်ငံကလေ့ ၁၀၀ ရာခိုင်နှုန်း မပြင်ဆင်နိုင်ပါ။ ယေကေလေ့ နိုင်သလောက် ကာကွယ်ဖို့ ပြင်ဆင်မှုတိလုပ်ထားရေ နိုင်ငံတိ ဟိပါရေ။ နိုင်ငံအရေအတွက်ကတော့ တဖဲ့ချေရာ ဟိပါရေ။ သေချာစွာကတော့ ဗမာနိုင်ငံမပါစွာပါ။ ၁၉၁၈-၁၉ ခုနှစ်မှာ Spanish Flu ဆိုပြီးကေ တုပ်ကွေးpandemic ဖြစ်ခပါရေ။ ယင်းကြောင့် လူပေါင်း သန်း၅၀ကျော် လပေါင်း ၁၈ လအတွင်းမှာ သီခကတ်ရပါရေ။ အမေရိကန်ပြည်ထောင်စုဆိုကေလေ့ သာမန်တုပ်ကွေးကြောင့်ပင် နှစ်စိုင် ဒေါ်လာ ၁၂ ဘီလီလျံ ဆုံးရှုံးနိန်ရပါရေ။ တကယ်တမ်းရာ ငှက်တုပ်ကွေး၊ ၀က်တုပ်ကွေးစသဖြင့် pandemicဖြစ်ခလို့ ဟိကေတော့ မစိုင်းစားနိုင်စရာပါ။ ယင်းအတွက်ကြောင့် ရောဂါမပြန့်ပွားအောင် ကာကွယ်ရပါဖို့၊ ဇာပိုင်ကာကွယ်နိုင်ဖို့လဲဆိုစွာကို သိထားသင့်ကတ်ပါရေ။

သတ္တ၀ါအပေါင်း ရောဂါဘယကပ်မှ ကင်းဝီးကတ်ပါစီ။

Reference

1. Garrett, Laurie; The Next Pandemic, Essential Readings in World Politics, Third Edition, page 586, Norton & Company, Inc., New York, 2008.

2. Centers for Disease Control and Prevention, Key Facts About Avian Influenza (Bird Flu) and Highly Pathogenic Avian Influenza A (H5N1) Virus, http://www.cdc.gov/flu/avian/gen-info/facts.htm, accessed on January 22, 2011.

3. Centers for Disease Control and Prevention, Questions and Answers About Avian Influenza (Bird Flu) and Avian Influenza A (H5N1) Virus, http://www.cdc.gov/flu/avian/gen-info/qa.htm, accessed on January 22, 2011.

4. WebMD, Frequently Asked Questions About Bird Flu, http://www.webmd.com/cold-and-flu/what-know-about-bird-flu?page=2, accessed on January 22, 2011.