Wetland သို့မဟုတ် "အကျိုးမြီ"

လွန်ခရေနှစ်တိထဲမှာ ရခိုင်ပြည်နာင့် ဗမာပြည်က ရာသီဥတုဖောက်ပြန်နိန်စွာတိကို မကြာမကြာကြားလာရပါရေ။ စစ်တွေနာင့် တချို့ဒေသတိမှာ ခါတိုင်းထက် ချမ်းလာစွာတိ၊ ပိုအားကောင်းရေ မုတ်သုန်မုန်တိုင်းတိက ၀င်ရောက်လားခစွာတိကို ဖတ်သိမြင်သိ
နိန်ရပါရေ။ ယင်းပိုင် ဒေသအလိုက်ဆိုရွားမှုတိကို သိပံ္ပနည်းကျ လေ့လာဆန်းစစ်မှုတိ လိုအပ်နိန်ရေ အချိန်မှာ သတင်းတစ်ပုဒ်ကြားရစွာက ဆူနားမီနောက်၃ရက်အတွင်းမှာ တိုက်ဖို့ဆိုလို့ ရခိုင်ပြည်သူတိ ကြောက်နိန်ကတ်ရရေဆိုရေ သတင်းပါ။ ဆူနာမီလာဖို့ဆိုစွာကို ဇာသိပံ္ပပညာရှင်ကလေ့ ၃ရက်မပြောပါကေ့၊ ၁ရက်တောင် ကြိုမသိနိုင်ပါဂါ။ ဖြစ်ပေါ်လာရေ ကမ္ဘာ့မြီအောက်ပိုင်း မတည်ငြိမ်မှုတိဖြစ်ပြီး နာရီပိုင်းအတွင်းမှာ လာနိုင်စွာပါဂါ။ ယထာဘူယျမကျရေ ကောလဟာလသတင်းတိကြောင့် ကိုယ့်ရခိုင်သူရခိုင်သားတိ စိုးရိမ်ကြောင့်ကြ ကြရလို့ စိတ်မကောင်းဖြစ်မိပါရေ။ ယင်းပိုင်သျှောင် သဘာဝပတ်ဝန်းကျင်နာင့် သိပ္ပံလေ့လာချက်တိကို ပိုမိုသိဟိနိုင်ဖို့ တစေ့တစောင်း အနေနာင့် အေဆောင်းပါးကို ရွီးလိုက်ရပါရေ။ သဘာဝပတ်ဝန်းကျင်နာင့် ပတ်သက်ပြီးကေ အေဂုခေတ်မှာ လေ့လာမှုတိ ကောင်းများလာပါရေ။ ကိစ္စတစ်ခုကို ယေဘုယျလေ့လာစွာထက် စောက်နက်လေ့လာ လာကတ်တေ ခေတ်ရိလူတန်းစားတိမှာ လေ့လာနိန်ရေ အကြောင်းအရာတိက အများကြီးပါ။ ယင်းအထဲက Wetland လို့ခေါ်ရေ "အကျိုးမြီ" အကြောင်းကို အကျဉ်းချုပ်ရွီလားဖို့ဖြစ်ပါရေ။

အတိုချုပ်ပြောရဖို့ဆိုကေ အကျိုးမြီဆိုစွာက အကျိုးပြုရေ သဘာဝမြီပါ။ "အကျိုးမြီ"ဆိုစွာကို သေချာမပြောခင် သူ့အဓိပ္ပာယ်ဖွင့်ဆိုချက်ကို စိကေချေလေ့လာကတ်ပါမေ။ အင်းဂလိပ် ဘာသာအရ Wetland "စွတ်စိုနိန်ရေမြီ"လို့ ခေါ်ပါရေ။ Wetlandလို့ဆိုကေ ရီဟိကေ ပြီးပျာယ်လား၊ ရီနာင့်စိုနိန်ကေပြီးပျာယ်လားလို့ မိန်းစရာဟိပါရေ။ အမေရိကန်ပြည်ထောင်စု သဘာဝပတ်ဝန်းကျင် ထိန်းသိမ်းရီးအေဂျင်စီနာင့် "ရီထု သန့်စင်ရီးဥပဒေ"တိက အဓိပ္ပာယ်ဖွင့်ဆိုစွာက "မြီပြင်ရီထုနာင့် မြီအောက်ရီလမ်းကြောင်းတိက အပင်တိပေါက် ရောက်နိုင်လောက်အောင် ထောက်ပံ့ပီးနိုင်ရေ မြီ"လို့ ဆိုပါရေ။ တနည်းအားဖြင့်ပြောရဖို့ဆိုကေ အကျိုးမြီလို့ ခေါ်ဆိုနိုင်ဖို့ ရီ၊ အပင်။ မြီသား သုံးခုသော အင်ဂါရပ်နာင့် ပြည့်စုံရပါဖို့လို့ ဆိုလိုခြင်း ဖြစ်ပါရေ။ တချို့သိပ္ပံပညာရှင်တိကတော့ ယင်းအင်ဂါသုံးခုထဲက တစ်ခုခုနာင့် ပြည့်စုံကေ ပြီးယာလို့ ဆိုပါရေ။
ယင်းချင့်ကို ထောက်ခံရေအနိန်နာင့် အမေရိကန်ပြည်ထောင်စု "ငါးနာင့်တောရိုင်းသတ္တ၀ါဌါန" ကလည်း ယင်းအင်ဂါရပ်သုံးခုထဲက တစ်ခုခုနာင့် ပြည့်စုံကေ အကျိုးမြီလို့ ခေါ်နိုင်ရေလို့လည်း သူ့ဥပဒေပြဌါန်းချက်တိမှာ ရွီးစွာကိုလည်း တွိရပါရေ။ ယင်းကြောင့် စွတ်စိုနိန်ရေမြီလို့ အင်းဂလိပ်ပိုင်သုံးစွာရေ တစိချေ မပြည့်စုံလို့ ပြောလို့ရရေပိုင် ပြည့်စုံလောက်ယင့်လို့လည်း ပြောလို့ရပါရေ။

ယေကေ နောက်တစ်ဆင့်အနိန်နာင့် အကျိုးမြီဆိုစွာက ဇာလဲ။ ဇာကိုအတိအကျပြောစွာ ပါလဲဆိုစွာကို လေ့လာကြည့်ကတ်ပါမေ။ အကျိုးမြီဆိုစွာ မြီထုနာင့် ရီထုကြားမှာ ဆက်စပ်နိန်ရေ ကြားစပ်နယ်ကို ခေါ်ပါရေ။ အကျွန်ရို့ရခိုင်ပြည်မှာ မြစ်ချောင်းအင်းအိုင် ပေါပါရေ။ ယင်းမြစ်ချောင်းနားမှာ အပင်တိအများကြီး ပေါက်ပါရေ။ ရီချိုမှာလည်း ရီချိုအလျောက်၊ ရီငန်မှာလည်း ရီငန်အလျောက် ပေါက်ကတ်ပါရေ။ တချို့အပင်တိက ချုံပုတ်ချေတိအနိန်နာင့် ပေါက်နိန်ရေ အပင်ချေတိဟိရေပိုင် တချို့အပင်တိကလည်း ကြီးနိုင်ပါရေ။ ဥပမာ - အုန်းပင်၊ ပံလင်ပင်အစဟိရေ အပင်အမျိုးအစားတိအများကြီးကို တွိရပါဖို့။ ယင်းပိုင်ရီသားနာင့် မြီသားကြားမှာ တည်ဟိနိန်ရေ ကြားစပ်နယ်ကို ခေါ်စွာပါ။ တချို့အကျိုးမြီတိဆိုကေ လူတိကအကျိုးဟိရေလို့တောင် မထင်ကတ်ပါ။ ဥပမာ နွံအိုင်တိပါ။ တချို့အကျိုးမြီတိကို အနံနာင့်တောင် ခွဲလို့ရပါရေ။ ဇာဖြစ်လို့လဲဆိုကေ အနံ့အသက် မကောင်းလို့ပါ။ ယင်းမကောင်းရေ အနံ့တိကို ယင်းအကျိုးမြီမှာ သက်ဟိနိန်ထိုင်ကတ်တေ ပိုးမွှားချေတိ (microbes)တိက ထုတ်လွှင့်ပီးလို့ပါ။ မြီပွင့် (Sand or Silt or Clay particles) တိကြားမှာ ဟိရေ လီနိန်ရာတိရေ ရီတိနာင့် ပြည့်လားရေခါ အောက်စီဂျင်ဓာတ်ရေ နည်းပါးလာပါရေ။ တနည်းအားဖြင့် အင်းဂလိပ်ပိုင်ဆိုကေ Anaerobic Condition ဖြစ်လားရေလို့ ဆိုပါရေ။ ယေခါ ယင်းပိုးမွှားတိက မကောင်းရေ အနံ့ဆိုးတိကို ထုတ်ပီးခြင်းဖြစ်ပါရေ။ ယင်းပိုင်ပျာယ် အောက်စီဂျင်နည်းပါးရခြင်းက မြီထုသဏ္ဍာန်ကို ပြောင်းလဲစီပြီးကေ ယင်းအကျိုးဆက်အဖြစ် ယင်းမြီအမျိုးအစားမှာ ပေါက်နိန်ရေ အပင်သဏ္ဍာန်ကိုလည်း ပြောင်းလဲစီပါရေ။ မြီသားအရောင်တိဆိုကေ အမဲရောင်၊ မဟုတ်ကေ မဲပြာပြာအရောင်တိဖြစ်လားပါရေ။ တချို့အပင်တိဆိုကေလည်း အမြစ်တတိုချေနာင့်၊ မဟုတ်ကေ ပုံမှန်အပင်မြစ်ပုံစံမပေါက်ဘဲနာင့် ကားရီကားရား ပုံသဏ္ဍာန်မျိုး ဆောင်နိန်တတ်ပါရေ။

အကျိုးမြီ၏ အဓိပ္ပာယ်နာင့် သူ့၏ အသွင်လက္ခဏာတိကို သိဟိစွာက ဟုတ်ပါပျာယ်။ သူက သဘာဝကို ဇာပိုင်အထောက်အကူပြုပါလဲ၊ လူသားတိကို ဇာအကျိုးဟိစီပါလေ။ အကျွန်ရို့ ရခိုင်ပြည်မှာ မိုးကြီးပါရေ။ အညာရီပေါက်ပါရေ။ မုန်တိုင်းတစ်ခုကျကေ မိုးကြိုးပစ်လို့၊ အိမ်ပြိုလို့ သီရေလူထက် ရီကြီးလို့ ရီတက်လို့ သီရေလူက ပိုများတတ်ပါရေ။ ကမ်းရိုးတန်းတလျှောက်မှာ အဖရခိုင်ပြည်၏ ရီပြင်ကို အမှီသဟဲပြုပြီးကေ အသက်မွီးဝမ်းကျောင်းနိန်ကတ်ရရေ ရခိုင်သူရခိုင်သားတိအတွက် အန္တရာယ်ကြီးလှပါရေ။ ရီတတ်လာနိုင်ရေ မြစ်ချောင်းနာင့် လူနိန်အိမ်ခြေကြားမှာ ဟိနိန်ရေ အကျိုးမြီတိကိုရာ ရှင်းပလိုက်ဖို့ဆိုကေ ပိုပြီးကေ အန္တရာယ်ကြီးလားပါဖို့။ ယင်းအပင်တိက မြီကြီးကို ဆုတ်ထားပိုင်ဖြစ်ပြီးကေ ကမ်းပြိုခြင်း ရီကြီးခြင်းတိကို တဘက်တလမ်းက ကာကွယ်ပီးနိန်စွာပါ။ ယင်းအတွက် ကြောင့် အကျိုးဟိလှပါရေ။

နောက်အကျိုးကျေးဇူးတစ်ခုက ရီသန့်စင်ခြင်းပါ။ အကျိုးမြီတိရေ နေရာအနှံ့အပြားက စီးဆင်လာရေ ရီတိကို သူ့ဘားမှာ တင်စီပြီးကေ မြီသားအလွှာအထပ်ထပ်ကနိန်တဆင့် တဖြည်းဖြည်းသန့်စင်ပီးပြီးကေ မြီအောက်ရီကန် (underground watertable) နာင့် တခြားရီလမ်းကြောင်းထဲတိကို ပို့ပီးပါရေ။ စီးဆင်းလာစွာ ရီတိက အစတည်ရေနိန်ရာကို လိုက်ပြီးကေ အညစ်အကြေးအမျိုးမျိုး ပါလာနိုင်ပါရေ။ ဥပမာ - ကုန်ထုတ်စက်ရုံတိက ညစ်ညမ်းရီတိ၊ လယ်ကွင်းက ဓာတ်မြေသြဇာဓာတ်တိနာင့် ရီတိ၊ ကားဝက်ရှုပ်က စီးဆင်းလာရေ စက်ဆီချောဆီတိပိုင်ပါ။ တချို့အင်းဂျီဖွတ် သပုန်တိထဲမှာပါလာရေ Phosphorus ဓာတ်သတ္တုကလည်း သဘာဝကို ညစ်ညမ်းစီပါရေ။ ယင်းအညစ်အကြေးတိကို အကျိုးမြီက သန့်စင်ပီးနိုင်ပါရေ။ အမေရိကန်ပြည်ထောင်စုက ရီသန့်စင်ရီးစက်ရုံတိ (Water Treatment Plants)ရေ သဘာဝက သန့်စင်ပုံစံကို မှီငြမ်းပြီးကေ ဆောက်လုပ်ထားကတ်စွာတိပါ။ တချို့ဒေသတိမှာဆိုကေ ကုန်ထုတ်စက်ရုံတိက ထွက်ဟိလာရေ ညစ်ညမ်းရေ ရီတိကို ယင်းအကျိုးမြီထက်မှာ ဖြန်းစီပြီးကေ သန့်စင်စီပါရေ။ သဘာဝက အလိုအလျောက် စီမံပီးထားရေ ကောင်းတန်ဖိုးကြီးရေ ယန္တာရားတစ်ခုဖြစ်ပါရေ။ ယင်းအတွက်ကြောင့်လည်း အကျိုးမြီကို "သဘာဝ၏ ကျောက်ကပ်"လို့ တင်စားကတ်ပါရေ။ ကျောက်ကပ်က လူ့ခန္ဓာက အညစ်အကြေးတိကို သန့်စင်နိုင်မှုနာင့် နှိုင်းမှုသဟု ပြုကတ်ပါရေ။ ကိန်းကဏန်းတိအရဆိုကေ မြီအောက်ရီကန်ထဲမှာ ထုထည်ကုဗကီလိုမီတာ သန်းပေါင်း ၂၃.၄ ဟိပါရေ။ ကမ္ဘာ့ရီထုထဲက တတိယအများဆုံး ရီဟိရေ နိန်ရာဖြစ်ပါရေ။ အမေရိကန်ပြည်ထောင်စုမှာ သုံးစွဲရေ ရီအားလုံး၏ ၂၄ ရာခိုင်နှုန်းရေ မြီအောက်ရီကန်က ရစွာပါ။ အကျွန်ရို့ ရခိုင်ပြည်မှာ မိုးရေချိန်များလို့ ရီပြဿနာက အေလောက်မဆိုးလို့ ပြောလို့ရကေလေ့ ရီသန့်ထုတ်လုပ်ရီး ပြဿနာက ကောင်းဆိုးပါရေ။ အထက်တန်းကျောင်းတိက ဓာတုဗေဒဘာသာရပ်မှာ PH 7 ဟိရေ ရီရေ ရီအသန့်ဆုံးဖြစ်တေလို့ သင်နိန်ရကေလေ့ သောက်နိန်ရရေ ရီတိကို ပုံမှန် PH စစ်တေလို့ မကြားဘူးမမြင်ဘူးပါ။ နယ်ဘက်မှာဆိုကေ ပိုတောင်ဆိုးပါရေ။ ရီအရောင်ကို ကြည့်လိုက်စွာနာင့်ကို သိနိုင်ပါရေ။ ယင်းပိုင်ရီကို မသောက်ချင်ကေ မြီအောက်ရီကန်က နိန်ပြီးကေ သောက်လို့ရပါရေ။ ညစ်ညမ်းမှုကင်းရေ နိန်ရာနားမှာ အ၀ီစိတွင်းတိတူပြီးကေ သောက်နိုင်ပါရေ။ ယင်းရီတိရေ သဘာဝက သူ့အလိုအလျောက် သန့်စင်ပီးထားရေ ရီပါ။ ၀ါကြင်ကြင်ရီိကို သောက်စွာထက်စာကေတော့ခါ အများကြီးသန့်ပါရေ။ စနစ်တကျလေ့လာစမ်းသပ် စစ်ဆီးသန့်စင်ထားရေ ရီရနိုင်ကေတော့ခါ အကောင်းဆုံးပါပျာယ်နင်းရာ။ လောလောဆယ် ရီသန့်မ၀ယ်နိုင်ကေ ယင်းမြီအောက်ရီတိက သင့်တော်ပါရေ။ ယင်းပိုင်အကျိုးကျေးဇူးတိပီးရေ အကျိုးမြီိကို ကာကွယ်စောင့်ရှောက် သင့်ပါရေ။ နောက်အကျိုးဆက်တစ်ခုကတော့ခါ ဂေဟက်စနစ် (Ecosystems)ထဲမှာ တည်ဟိနိန်ကတ်တေ တခြားသတ္တ၀ါတိအတွက်ပါ အသုံးဝင်ခြင်းပါ။ သန္တာကျောက်ဆောင်တိ (Coral Reef) နာင့် အပူပိုင်းသစ်တော (Rain Forest)တိနာင့်အတူ အကျိုးမြီဆိုစွာလည်း ဂေဟစနစ်အတွက် အရီးကြီးဆုံးထဲက တစ်ခုပါ။ ဥပမာ - အကျိုးမြီမှာ လာပြီးကေ တချို့ငါးနာင့် အခွံပါတ္တ၀ါ(Shellfish) တိရေ မျိုးဥဖောက်ခြင်း၊ မျိုးပွားခြင်းတိကို ပြုလုပ်တတ်ကတ်ပါရေ။ ယင်းအကျိုးမြီကို ရှင်းလင်းပလိုက်ကေ အကျွန်ရို့ ရခိုင်ပြည်က တံငါသည်ကြီးတိ ငါးရနှုန်းနည်းပါးလားနိုင်ပါရေ။ စီးပွားရီးယန္တရား သဘာဝအရ ထုတ်ကုန်(Supply)ကျလားပြီးကေ လိုကုန်(Demand)က ယင်းအတိုင်းရာဆိုကေ ကုန်ဈေးနှုန်းကြီးလာပါဖို့။ ငါးဈေးနှုန်းတက်လာကေ ပြည်သူတိကို ထိခိုက်စီပါဖို့။ ယင်းအတွက်ကြောင့် ဂေဟစနစ်လို့ဆိုရေပိုင် တစ်ခုနာင့်တစ်ခု ဆက်စပ်နိန်စွာပါ။ နောက်တစ်ခုက ယင်းအကျိုးမြီရေ တချို့ငှက်တိအတွက် စားကျက်ပါ။ ယင်းအကျိုးမြီရာမဟိဆိုကေ ယင်းငှက်တိအစာယှာရေ နိန်ရာရေ ပြောင်းလားပါဖို့။ ယင်းငှက်တိရေ တောင်သူဦးကြီးတိ စိုက်ထားရေ ကောက်ပဲသီးနှံတိကို လာစားနိုင်ပါရေ။ ယင်းပိုင်ပပျာယ် တခြားတိရိစ္ဆာန်တိ၊ မျက်စိနာင့် မမြင်နိုင်ရေ ပိုးမွှားချေတိ၊ အပင်တိကိုလည်း ထိခိုက်ပြုန်းတီးစီနိုင်ပါရေ။ ယင်းအတွက်ကြောင့် အကျိုးမြီကို ကာကွယ်သင့်ပါရေ။

ထိရောက်တေ ကာကွယ်နိုင်မှုတိပြုလုပ်နိုင်ဖို့အတွက် ဥပဒေပြုမှုတိ လိုအပ်ရေပိုင် ပညာပီးလုပ်ငန်းတိလည်း လိုအပ်ပါရေ။ ယင်းမှရာ ရေရှည်အကျိုးကျေးဇူးကို ခံစားနိုင်ဖို့ဖြစ်ပါရေ။ ၁၉၇၀ ခုနှစ်မတိုင်ခင်က အမေရိကန်ပြည်ထောင်စုမှာဆိုကေ နိုင်ငံတိုးတက်ရီးဆိုပြီးကေ ရရေနိန်ရာမှာ လမ်းတိဖောက်၊ စက်ရုံတိဆောက်ခကတ်ပါရေ။ စီးပွားရီးရှုထောင့်တစ်ခုထဲကရာ ကြည့်ပြီးကေ (ဂေဟစနစ်ရှုထောင့်က မကြည့်ခပါ။) လုပ်ပလိုက်စွာ အကျိုးမြီတိ အများကြီး ပြုန်းပါလားပါရေ။ ကယ်လီဖိုးနီးယားပြည်နယ်မှာဆိုကေ ဟိရေအကျိုးမြီ၏ ၉၀ ကနိန် ၉၅ ရာခိုင်နှုန်းထိ ဆုံးရှုံးလားပါရေ။ အကျိုးမြီကို ထိခိုက်စီရေ လုပ်ဆောင်ချက်တိကို ၁၉၇၀ခုနှစ်က စပြီးကေ တားမြစ်ထားပါရေ။ မိမိဆောက်လုပ်ဖို့ စီမံကိန်းတစ်ခုရေ အကျိုးမြီိကို တနည်းနည်းနာင့် ထိခိုက်မှု မပြုနိုင်အောင် ရှောင်ရှားကတ်ရပါရေ။ အစိုးရပါးက ခွင့်ပြုချက် (Permit)ဟိမှ လုပ်ကတ်ရပါရေ။ ထိခိုက်မှုကို တတ်နိုင်သလောက်နည်းပါးအောင် ပြုကတ်ရပြီးကေ ထိခိုက်ခကေလည်း လျော်ကြေးပီးကတ်ရပါရေ။ ဥပမာ - အကျိုးမြီ ဧကနှစ်ဧကကို မြီဖို့ပြီးကေ အထက်က လမ်ခင်းပလိုက်ကေ ယင်းလမ်းနာင့် (ဖြစ်နိုင်ကေ) အနီးဆုံးနိန်ရာမှာ အကျိုးမြီအသစ်တစ်ခုကို ပြုလုပ်စီပါရေ။ မဟုတ်ကေ ပြုလုပ်ပြီးသားအကျိုးမြီတိကို ရောင်းစားရေ ဘဏ်တိဘားက ၀ယ်ရပါရေ။ နောက်တစ်ခုက ပြည်သူတိကို အကျိုးမြီ ဇာလောက် အရီးကြီးလဲဆိုစွာကို အသိပီးခြင်းဖြစ်ပါရေ။ အစိုးရက အရာရာကို ဥပဒေနာင့် ထိန်းချုပ်စွာထက် ပြည်သူတိကို ပညာပီးပြီးကေ ပြည်သူတိ၏ ကျင့်ဝတ္တရားတစ်ရပ်ပုံစံမျိုးနာင့် သဘာဝကို ချစ်မြတ်ကာကွယ်လားနိုင်အောင် လုပ်ပြီးကေလည်း အကျိုးမြီကို ကာကွယ်နိုင်ပါရေ။

အကျွန်ရို့ရခိုင်ပြည်ကတော့ အမေရိကားလောက် ခရီးမရောက်နိုင်ပါသိ။ ရခိုင်ပြည်အချိန်ဟုန်မြင့်တိုးတက်ဖို့အတွက် အခြေခံအဆောက်အုံ (Infrastructure)နာင့် ဖွံဖြိုးရီးလုပ်ငန်းတိ အများကြီးလိုအပ်ပါသိရေ။ ဆေက်စရာ၊ ဖောက်စရာ အဆောက်အအုံတိ လမ်းတိ အများကြီးလိုပါသိရေ။ ယေကေလေ့ တိုးတက်မှုကို လုပ်ဆောင်ရေအခါမှာ စီးပွားရီးရှုထောင့်အပြင် တခြား ဂေဟက်ရှုထောင့်၊ တခြားသမိုင်းရှုထောင့် (ဥပမာ - သမိုင်းဝင်မြီတိကို ဖြတ်ပြီးကေ၊ ဖျက်ပြီးကေ ဆောက်လုပ်တေ စီမံကိန်းမျိုး) တိကိုလည်း ထည့်သွင်း စိုင်းစားရဖို့ဖြစ်ပါရေ။ သဘာဝဓာတ်ငွေ့လိုင်းတိကို တောတောင်ချိုမြောင်ကြားတိက ဖောက်လုပ်ကေ ဇာအကျိုးဆက်တိက ဖြစ်နိုင်ဖို့လဲဆိုစွာကို ထည့်သွင်းစိုင်းစားရဖို့ဖြစ်ပါရေ။ တိုးတက်မှုကို လုပ်ဆောင်ရေအခါမှာ ကိုယ်ရိက လူတိ၊ နိုင်ငံတိ လုပ်ဆောင်ချက်တိထဲက အမှားတိကို စံနမူနာယူပြီးကေ ရေရှည်ကောင်းမွန်ရေ ပေါ်လစီကို ချတတ်ဖို့ အရေးကြီးပါရေ။ နိုင်ငံတစ်နိုင်ငံ မဖွံဖြိုးခင် လုပ်ဆောင်ချက် ၁၀ခုမှာ ၂ခုက မှားနိန်ကေ အကျွန်ရို့ ရခိုင်ပြည်တိုးတက်ရီးကို လုပ်ဆောင်ရေခါ ယင်းအမှားနှစ်ခုကို ရှောင်ခြင်းအားဖြင့် အချိန်တိ၊ ဖဲ့ချာတိ အများကြီး သက်သာပါဖို့။ သဘာဝပတ်ဝန်းကျင်ကိုလည်း ထိခိုက်မှုနည်းပါဖို့။ ယင်းအတွက်နာင့် သဘာဝပတ်ဝန်းကျင်၊ ဂေဟစနစ်တိရေ လူ့အဖွဲ့အစည်းနာင့် ဆက်စပ်နိန်မှုတိကို သေချာသိဟိထားဖို့လိုအပ်ပါရေ။

ပြောင်းလဲမှုတိုင်း၏ နောက်မှာ အကြောင်းပြချက်တိက အမြဲတမ်းဟိစမြဲပါ။ ရာသီဥတု ဇာကြောင့် အေပိုင်ပြောင်းလဲလာရလေ၊ ဆူနာမီဇာကြောင့် ဖြစ်ရလေ ဆိုစွာတိအားလုံး၏ နောက်ကွယ်မှာ ယင်းရို့၏ အဖြေ (သို့မဟုတ်) အကြောင်းပြချက်တိရေ ဟိစမြဲပါ။ ယင်းအကြောင်းပြချက်တိကို သေချာသိပ္ပံနည်းကျရှင်းလင်းနိုင်သီဖြစ်စီ၊ မပြနိုင်သီဖြစ်စီ ယင်းအကြောင်းပြချက်ကတော့ တည်မြဲနိန်စမြဲပါ။ ယင်းအကြောင်းပြချက်တိကို လေ့လာရေလူကရာ သိဟိဖို့ဖြစ်ပါရေ။ ယင်းပိုင်သျှောင် လေ့လာဖော်ထုတ်နိုင်မှုရေ ပဓာနကျပါရေ။ လေ့လာရေလူတိကရာ သဘာဝပတ်ဝန်းကျင် ပြောင်းလဲမှုအပြင် တခြားဘာသာရပ်တိ၊ အကြောင်းအရာတိကိုလည်း ရှာဇွေဖော်ထုတ်နိုင်ဖို့ဖြစ်ပါရေ။ ပြဿနာတစ်ခုကို ယေဘုယျထင်မြင်ချက် ပီးစွာထက် ခေတ်ရိရခိုင်လူတန်းစားတစ်ရပ်ဖြစ်နိုင်အောင် ဆထက်တပိုး စောက်နက်လေ့လာသင့်ကတ်ပါကြောင်း .....


မှီငြမ်းချက်

1. Bass, Ronald E.; Herson, Albert I.; Bogdan, Kenneth M. The NEPA Book: A step-by-step guide on how to comply with the National Environmental Policy Act, page. 143, Salt Lake City, Utah, Solano Press, (2001).

2. Benedict, Mark A.; McMahon, Edward T. Green Infrastructure: Linking Landscapes and Communities, page171, Washington DC, Island Press, (2006).

3. Hofmann Wetland Mitigation, Importance of Wetlands, , accessed September 2008.

4. Nolon, John R. Open Ground: Effective Local Strategies for Protecting Natural Resources, page 457, Washington D.C, The Environmental Law Institute, (2003).

5. Mulamoottil, George.; Warner, Barry G.; McBean, Edward A. Wetlands: Environmental Gradients, Boundaries and Buffers, page 115. CRC Press, (1996).

6. Stedman, Susan-Marie.; Hanson, Jeanne. Habitat Connections: Wetlands, Fisheries and Economics, , accessed September 2008.

7. U.S. Environmental Protection Agency (2008), Wetlands Definition, , accessed September 2008.

8. U.S Environmental Protection Agency, What are Wetlands, , accessed September 2008.

9. U.S Environmental Protection Agency, Section 401 Certification and Wetlands, , accessed September 2008.

10. Wu, Meiyin.; Kalma, Dennis. (2007), Vegetative Assessment of Wetland Sites, , accessed September 2008.