“ရွှေမဲ”ခွန်၏ အနုပိုင်ညာ (၃)

(ဃ)ဖယ်ဒရယ်ပြည်ထောင်စုတိ
ဖယ်ဒရယ်ပြည်ထောင်စုတိ အများစုသည် ကောက်ခံရဟိရေ အခွန်ငွေ မျှဝီခြင်း (သို့) အခွန်ကောက်ခံနိန်ရာ မျှဝီခြင်း စရေ ပုံစံတစ်မျိုးမျိုးကို သုံးဂတ်သည်။ အခွန်ငွေ မျှဝီခြင်းပုံစံမှာ အခွန်ငွေကို ဗဟိုအစိုးရက ကောက်ခံပြီးကေ (ယူအေအီးပြည်ထောင်စုမှာဆိုကေ ဒေသခံအစိုးရတိက ကောက်ခံသည်။) တခြားအစိုးရအဆင့်ဆင့်ဘားကို သတ်မှတ်ထားရေ ဥပဒေအရသော်လည်းကောင်း၊ ပုံသေနည်းသုံးပြီးကေ တွက်ချက်ပြီးကေသော်လည်းကောင်း ပြန်လည်ဝီမျှပီးခြင်းကို ဆိုလိုသည်။ အခွန်ကောက်ခံနိန်ရာ မျှဝီခြင်းပုံစံမှာ ဆိုကေ အခွန်ကောက်ခံရေနိန်ရာတိထဲက တချို့ကို ဒေသခံအစိုးရတိက တာဝန်ယူကောက်ပီးစွာကို တွိရသည်။ ကောက်တေအခွန်အမျိုးအစားတိထဲက တချို့တိကို အခွန်နာမေတစ်ခုတည်း အောက်မှာသော်လည်းကောင်း၊ နာမေအမျိုးမျိုးအောက်မှာသော်လည်းကောင်း ထားပြီးကေ ကောက်ခံဂတ်သည်။

(ဃ-က) အခွန်ငွေ မျှဝီခြင်း
အခွန်ငွေမျှဝီခြင်း ပုံစံအမျိုးမျိုးရှိသည်။ တချို့နိုင်ငံတိက အစိုးရ၏ ပုံမှန်ငွေကြေးလွှဲပြောင်းနိန်ကျပုံစံ(ဗဟိုအစိုးရကနိန် ဒေသခံအစိုးရတိဘားကို ပုံမှန်ဖဲ့ချာ လွှဲပီးတတ်တေ ပုံစံ)အတိုင်း ရီနံခွန်ကို မျှဝီပြီးကေ တချို့ကလည်း သီးခြားပုံသေနည်းတိ သုံးပြီးကေ တွက်ချက်မျှဝီဂတ်သည်။ တချို့ကလည်း Derivation Principleလို့ခေါ်ရေ ဒေသတစ်ခု၏အခွန်ရှယ်ယာသည် ယင်းဒေသက ကောက်ခံရဟိရေ အခွန်ပမာဏအပေါ်မူတည်ရမည် ဆိုရေ ပုံစံကို သုံးဂတ်သည်။ တချို့ပုံစံတိက လူဦးရေ၊ လိုအပ်ချက်၊ အခွန်ကောက်ခံနိုင်မှုစွမ်းအား တိကို ထည့်သွင်းစိုင်းစားပြီးကေ မျှဝီဂတ်သည်။ တချို့ပုံစံတိက ရဟိရေ ရီနံခွန်အများအပြားကို ဒေသခံအစိုးရတိဘားကို ပီးပြီးကေ တချို့ကလည်း အနည်းချေရာ ပီးစွာကို တွိရသည်။ ယင်းပိုင် ဒေသခံအစိုးရတိကို အများကြီးပီးရေ ဒေသတိကတော့ နိုင်ဂျီးရီးယား၊ ရရှား၊ ကိုလံဘီယာနာင့် ဗင်နီဇွဲလားရို့ပိုင် နိုင်ငံတိဖြစ်သည်။ အနည်းချေရာပီးတတ်ရေ နိုင်ငံတိကတော့ အက်ကွေဒေါ၊ အင်ဒိုနီးရှား နာင့် မက်စီကိုရို့ပိုင် နိုင်ငံတိဖြစ်သည်။

ယင်းပိုင် အခွန်ငွေဝီမျှခြင်း၏ အားသာချက်တစ်ခုက ဒေသခံအစိုးရတိဘားကို ဖဲ့ချာလွှဲပြောင်းရစွာ လွယ်ကူခြင်းဖြစ်သည်။ အထူးသဖြင့် ရီနံခွန်က အဓိက အစိုးရအခွန်တော်ငွေ ဖြစ်နိန်ကေ ပိုတောင်လွယ်သည်။ ယင်းပိုင်အခွန်ငွေမျှဝီခြင်းသည် ရီနံခွန်အပေါ်မှာ ဗဟိုက ထိန်းချုပ်မှုတိကို နည်းပါးစီသည်။ ဒေသခံအစိုးရတိဘားကို ဖဲ့ချာတိ၊ လိုအပ်ချက်တိ ပြန်လည်ဖြန့်ဖြူးပီးဖို့ နည်းလမ်းတစ်ခု ဖြစ်လားခသည်။ ဒေသခံအစိုးရတိအကြားမှာ ညီညီမျှမျှဖြစ်အောင်သော်လည်းကောင်း၊ ဒေသတချို့မှာ အထူးလိုအပ်ချက်တိ ဟိလာခကေသော်လည်းကောင်း မျှဝီပုံ မျှဝီနည်းကို အတိုးအလျော့ ပြုလုပ်နိုင်သည်။

ရီနံခွန်မျှဝီခြင်း၏ အားနည်းချက်တိကတော့ နိုင်ငံ့စီးပွားရေး စီမံခန့်ခွဲမှုကဏ္ဍတိနာင့် ငွေကြေးပေါ်လစီတိကို အနှောက်အယှောက် ဖြစ်စီခြင်းပင်ဖြစ်သည်။ ယင်းအပြင် အခွန်ငွေမျှဝီခြင်းသည် နိုင်ငံရေးဆိုင်ရာ အငြင်းပွားစရာတိ များပြီးကေ တည်ငြိမ်မှုကင်းမဲ့တတ်သည်။

အထက်မှာဖော်ပြခရေပိုင် အခွန်မျှဝီခြင်း (Revenue Sharing)ကိုမသုံးချင်ကေ Assigning Revenue Basesလို့ခေါ်ရေ အခွန်ဝင်ပေါက်တချို့ကို ဒေသခံအစိုးရတိကို ကောက်ခံခွင့်ပီးရေ ပုံစံကိုလည်း သုံးနိုင်သည်။ ဥပမာ-မိမိဒေသက ထုတ်လုပ်တေ လုပ်ငန်းတိအပေါ်မှာ ကောက်တေအခွန်(Production Excises)ပိုင် အခွန်မျိုးကို ဒေသခံအစိုးရတိကို ကောက်ခွင့်ပီးခြင်းမျိုး ဖြစ်သည်။ ရီနံဈီးအပေါ်မှာ အခွန်ကောက်စွာထက် ရီနံထုတ်လုပ်ရေးလုပ်ငန်းပေါ်မှာ အခွန်ကောက်စွာက ဒေသခံအစိုးရတိအတွက် ပိုတည်ငြိမ်ရေ အခွန်ဝင်ငွေကို ရဟိစီဖို့ဖြစ်သည်။ ယင်းပိုင်ကောက်ခံကေ ရီနံထုတ်လုပ်ရေး ကုမ္ပဏီတိက သဘာဝပတ်ဝန်းကျင်ဆိုင်ရာ ထိခိုက်ပျက်စီးမှုတိကို ကျူးလွန်မိခကေ (မတော်တဆပဲဖြစ်ဖြစ်) ယင်းကုမ္ပဏီတိပါးက လျော်ကြေးလည်း တောင်းနိုင်ဖို့ဖြစ်သည်။ အမေရိကန်ပြည်ထောင်စုနာင့် ကနေဒါနိုင်ငံရို့မှာဆိုကေ ယင်းပိုင် ပုံစံမျိုးလုပ်ထားစွာကို တွိရသည်။

မက်စီကို (ရီနံခွန်ကို ကန့်သတ်မျှဝီခြင်း)
မက်စီကိုနိုင်ငံမှာဆိုကေ ရီနံခွန်သည် ပြည်သူပိုင်လုပ်ငန်းတိ၏ အခွန်ရှယ်ယာ တော်တော်များများကို ကိုယ်စားပြုထားသည်။ ၁၉၉၇-၂၀၀၀ ခုနှစ်စာရင်းတိအရ သုံးပုံတစ်ပုံနီးပါးခန့် ရှိသည်။ ရီနံတူးခွင့်(Extraction Rights)ကို ငှားလို့ရရေ ဖဲ့ချာ၊ အပိုရှိနိန်ရေ ရီနံကို ရောင်းလို့ရလာရေ ဖဲ့ချာ နာင့် အစိုးရပိုင် ရီနံကုမ္ပဏီ၏ အသားတင်ဝင်ငွေတိ အားလုံးပေါင်းသည် နိုင်ငံGDP၏ ၅ ဒသမ ၃ ရာခိုင်နှုန်းနာင့် ညီမျှနိန်စွာကို တွိရသည်။

ရီနံခွန်အများစုသည် ဗဟိုအစိုးရလက်ထဲကို လားကေလေ့ တချို့အနည်းစုကို ဒေသခံအစိုးရတိဘားကို ဥပဒေပြဌာန်းချက်တိနာင့်အညီ ပီးအပ်စွာကိုတွိရသည်။ ရီနံတူးခွင့်လိုင်စင်အဖြစ်ရဟိရေ ဖဲ့ချာ၏ ၂၀ ရာခိုင်နှုန်းကို ဗဟိုအစိုးရအောက်မှာဟိရေ အစိုးရချေတိအတွက် အထွေထွေငွေပဒေသာပင်ထဲကို ထည့်ပီးထားသည်။ ယင်းပဒေသာပင်ထဲကမှ ဒေသခံအစိုးရချေတိက သူ့ဒေသအသီးသီးအလိုက် အနည်းအများ ရဟိဂတ်သည်။ ရီနံတူးခွင့်လိုင်စင်အဖြစ်ရရေ ဖဲ့သာ၏ နောက်ထပ် ၃ ဒသမ ၁၇ ရာခိုင်နှုန်းကိုတော့ ရီနံထုတ်လုပ်တေဒေသ (သို့) ရီနံကို ပြည်ပတင်ပို့ရာဒေသရို့က မြူနီစပယ် အစိုးရတိကို ရီနံတူးခြင်း၊ ရီနံတင်ပို့ရောင်းချခြင်းတိကြောင့် ဖြစ်ပေါ်နိုင်ရေ သဘာဝပတ်ဝန်းကျင် ပျက်စီးမှုတိအတွက် လျော်ကြေးပီးသည်။

မက်စီကိုနိုင်ငံမှာ ရီနံခွန်မျှဝီခြင်းနာင့် ပတ်သက်ပြီးကေ လွန်ခရေ နှစ်တိမှာ အငြင်းပွားမှုတိ မဟိသလောက်နည်းပါးစွာကို တွိရသည်။ အကြောင်းမှာ ရဟိလာရေ အခွန်တိကို လမ်းကြောင်းအမျိုးမျိုးကနိန် မြင်သာထင်သာဟိရေ ပုံသေနည်း (Transparent Formula)တိသုံးပြီးကေ မျှဝီဖြန့်ဖြူးပီးနိန်လို့ဖြစ်သည်။ မြူနီစပယ်အစိုးရတိကို ရီနံထုတ်လုပ်ခြင်း၊ ပြည်ပတင်ပို့ခြင်းနာင့် ပတ်သက်ပြီးကေ အခွန်တဖဲ့ချေကို တိုက်ရိုက်ပီးစွာကလွဲလို့ ရီနံထုတ်လုပ်တေ ဒေသခံအစိုးရနာင့် အထွေထွေရီနံခွန် မျှဝီခြင်းတိပုံစံကြားမှာ တိုက်ရိုက်ပတ်သတ်မှုတိ မရှိစွာကို တွိရသည်။ ယင်းအပြင် ရီနံခွန်သည် ဒေသခံအစိုးရတိ၏ အခွန်ငွေ အနည်းအကျဉ်းကိုရာ ကိုယ်စားပြုရေအတွက်နာင့် အထက်ဖော်ပြပါရီနံခွန်မျှဝီခြင်းစနစ်ရေ ဗဟိုအစိုးရ၏ နိုင်ငံငွေကြေးပေါ်လစီတိကို မတည်ငြိမ်မှု ဖြစ်ပေါ်ခြင်း မရှိစွာကို လေ့လာသိရှိရပါသည်။

နိုင်ဂျီးရီးယား
ရီနံရေ နိုင်ဂျီးရီးယားနိုင်ငံ၏ အဓိက၀င်ငွေဖြစ်သည်။ ၂၀၀၀ ခုနှစ်စာရင်းတိအရ အစိုးရအခွန်ငွေစုစုပေါင်း၏ ၈၂ ရာခိုင်နှုန်းကို ရီနံက ရရှိပါသည်။ တနည်းအားဖြင့် နိုင်ငံGDP၏ ၄၀ ရာခိုင်နှုန်းနာင့် ညီမျှသည်။ ၁၉၉၉ ခုနှစ် အခြေခံဥပဒေက အခွန်ကောက်ခံမှုနာင့် ထိန်းချုပ်မှုတိကို ဖယ်ဒရယ်အစိုးရလက်ထဲကို လွှဲပြောင်းပီးထားပြီးကေ ကမ်းထက်ရီနံထုတ်လုပ်ရေးက ကောက်ခံရရှိရေ ရီနံခွန်၏ အသားတင် ၁၃ ရာခိုင်နှုန်းကို ရီနံထုတ်လုပ်တေ ဒေသတိကို လွှဲပီးထားစွာကို တွိရသည်။ ဗဟိုဖယ်ဒရယ် အစိုးရက First Chargesလို့ဆိုပြီးကေ ဗဟိုအစိုးရအတွက် အခွန်တချို့တ၀က်ကို ယူပြီးလို့ကျန်စွာ အခွန်တိကို ပြည်နယ်နာင့် ဒေသခံအစိုးရချေတိကြားမှာ ပါလီမန်က ဆုံးဖြတ်တေ ပုံသေနည်းအတိုင်း တွက်ချက်ခွဲယူဂတ်သည်။ ယင်းပုံသေနည်းကို ၅ နှစ်တစ်ခါစီ ပြန်ပြောင်းသုံးသပ်ပြီးကေ ပုံသေနည်းကို ပြောင်းသင့်မပြောင်းသင့် ဆုံးဖြတ်ဂတ်သည်။ ပြောင်းသင့်က ပြောင်းလဲသည်။ အစိုးရအသုံးစရိတ်ဘားဂျတ်ကိုပယ်လို့ ကျန်ရေအခွန်ငွေတိကို အထက်မှာဖော်ပြခရေနည်းအတိုင်းပျာယ် ရီနံထွက်ရေ ဒေသတိကို ၁၃ ရာခိုင်နှုန်း ပီးပနာ ကျန်စွာကို တခြားပြည်နယ်နာင့် ဒေသခံအစိုးရချေတိကို ပြန်ပြီးကေ ၀ီမျှပီးသည်။

ပုံသေနည်းကို အစိုးရဘားဂျတ်အစီရင်ခံစာတိမှာပါရေ ခန့်မှန်းခြေ ရီနံဈီးနှုန်းအပေါ်မှာ မူတည်ပြီးကေ ပြုလုပ်သည်။ တကယ်လို့ ရီနံဈီးရေ အယင်ခန့်မှန်းခရေဈီးထက် များနိန်လို့ အခွန်ငွေလည်း ခန့်မှန်းခြေထက် ပိုရကေ ပိုရရေအခွန်ငွေတိကို အစိုးရတိကြားမှာ ၀ီမျှပီးတတ်သည်။ ၀ီမျှမပီးကေတောင်မှ နောင်လာဖို့ နှစ်တိမှာ သုံးဖို့ စုထားပီးတတ်သည်။ ရီနံဈီးက ခန့်မှန်းထားစွာထက် နည်းနိန်ကေလည်း ရသင့်ရေဖဲ့ချာ ပမာဏကို ဖြန့်ဝီပီးသည်။

ပြည်နယ်နာင့်ဒေသခံမြို့၊ ရွာအစိုးရတိသည် ဖယ်ဒရယ်အစိုးရ၏ အခွန်ငွေမျှဝီခြင်းအစီအစိုင်တိပေါ်မှာ အများကြီးမှီခိုနိန်ဂတ်ရသည်။ ၁၉၉၉ ခုနှစ်စာရင်းအရ Value Added Tax (VAT)ပိုင် အခွန်တိအပါအ၀င် ပြည်နယ်အစိုးရ ရဟိရေ အခွန်ဝင်ငွေ စုစုပေါင်း၏ ၇၅ ရာခိုင်နှုန်းသည် ဗဟိုအစိုးရ၏ အခွန်ငွေမျှဝီခြင်းက ရဟိခြင်းဖြစ်သည်။ ဒေသခံ မြို့၊ ရွာတိရဟိရေ အခွန်ငွေ စုစုပေါင်း၏ ၉၄ ရာခိုင်နှုန်းဆိုကေလည်း ဗဟိုအစိုးရ၏ အခွန်ငွေမျှဝီခြင်းကပဲ လာစွာပင်ဖြစ်သည်။ ယင်းအခွန်တိအများစုသည် ရီနံနာင့်ပဲ ပတ်သက်နိန်တတ်သည်။ ဖယ်ဒရယ်အစိုးရက ဒေသခံအစိုးရတိကို မျှဝီပီးရေ အခွန်တိသည် ၁၉၉၉ ခုနှစ်က နိုင်ငံGDP၏ ၇ ဒသမ ၄ ရာခိုင်နှုန်းဟိခစွာကနိန် ၂၀၀၁ ခုနှစ်ရောက်တေခါ ၁၅ ဒသမ ၃ ရာခိုင်နှုန်းအထိ တက်လားခစွာကို တွိရသည်။

နိုင်ဂျီးရီးယားနိုင်ငံမှာ သုံးနိန်ရေ အခွန်မျှဝီရေးပုံစံ၏ အားနည်းချက်နှစ်ရပ်ကတော့ ရီနံအရင်းအမြစ်တိအပေါ်မှာ အငြင်းပွားမှုတိများခြင်း၊ ဒေသခံအစိုးရတိ၏ ငွေကြေးဆိုင်ရာ စီမံမှုများတွင် စည်းမဲ့ကမ်းမဲ့နိုင်လွန်းခြင်းရို့ ဖြစ်သည်။ ရီနံမျှဝီပုံမျှဝီနည်းတိသည် Derivation Principleလို့ခေါ်ရေ ဒေသတစ်ခု၏အခွန်ရှယ်ယာသည် ယင်းဒေသက ကောက်ခံရဟိရေ အခွန်ပမာဏအပေါ်မူတည်ရမည် ဆိုရေ မူကိုသုံးရေပိုင် အားလုံးကို ဖြန့်ဝီသင့်သည်(Distribution Principle)ဆိုရေ မူကိုလည်း သုံးထားစွာကို တွိရသည်။ ယင်းအတွက်ကြောင့် အငြင်းပွားစရာ၊ သဘောမတူစရာတိလည်း ဖြစ်ဖို့များသည်။ ပထ၀ီအနိန်အထားအရကလည်း ကမ်းလွန်နာင့် ကမ်းထက် ရီနံသိုက်တိမှာ နိုင်ငံ၏ ပြည်နယ် ၃၆ ပြည်နယ်ထဲက ပြည်နယ်တချို့မှာရာ စုပြုံပြီးကေ တည်ဟိနိန်ပါသည်။ ရီနံထုတ်တေ ပြည်နယ်တော်တော်များများကလည်း ရဟိရေ အခွန်ငွေအပေါ်မှာ အလုံးစုံ စီမံထိန်းချုပ်ပိုင်ခွင့်ကို လိုချင်ဂတ်သည်။ တခြားရီနံထုတ်လုပ်တေပြည်နယ်တိကလည်း လက်ဟိကမ်းထက်ရီနံက ရဟိရေ ၁၃ ရာခိုင်နှုန်းရှယ်ယာ အပြင် ကမ်းလွန်ရီနံထုတ်လုပ်ရေးကလည်း ၁၃ ရာခိုင်နှုန်းရသင့်ရေလို့ တောင်းဆိုဂတ်သည်။ (ကမ်းလွန်ရီနံရေ ရီနံခွန်စုစုပေါင်း၏ ၄၀ ရာခိုင်နှုန်းနာင့် ညီမျှသည်။) ယင်းအတွက်ကြောင့် နိုင်ဂျီးရီးယားနိုင်ငံမှာ ရီနံထုတ်လုပ်တေပြည်နယ်တိက ရှယ်ယာ ပိုရဟိရေးကို တောင်းဆိုနိန်ဂတ်တေပိုင် ရီနံမထွက်တေဒေသတိကလည်း ဗဟိုအစိုးရပါးက ၀ီစုပိုရဖို့အတွက် တောင်းဆိုနိန်ဂတ်စွာကို တွိရသည်။

နိုင်ဂျီးရီးယားနိုင်ငံမှာ အောက်ခြေအစိုးရချေတိနာင့် ပတ်သက်လို့ ငွေကြေးဆိုင်ရာ စည်းမျဉ်းစည်းကမ်းတိကို တရားဝင်ပြဌာန်းထားခြင်းမဟိစွာကို တွိရသည်။ ၂၀၀၀-၂၀၀၁ ခုနှစ် ရီနံဈီးတက်ရေအချိန်က ဒေသခံအစိုးရတိ (အထူးသဖြင့် ရီနံထွက်တေ ပြည်နယ်တိ)သည် ခါတိုင်းထက်ပိုပြီးကေ အခွန်ငွေ ရရှိခသည်။ ယေကေလေ့ ရရှိရေ ဖဲ့ချာကို ဇာပိုင် စနစ်တကျ အကျိုးဟိဟိ သုံးစွဲဂတ်ရဖို့ဆိုရေ စည်းကမ်းသတ်မှတ်ချက်တိကိုကျခါ တခါတည်းထည့်သွင်း မပီးခစွာကို တွိရသည်။ ယေခါ ရဟိရေ ဖဲ့ချတိကို ဒေသခံအစိုးရတိက မဆင်မခြင် သုံးစွဲပလိုက်သည်။ ယင်း၏အကျိုးဆက်အဖြစ် ကုန်ပစ္စည်းဈီးတိ တက်လားခြင်း၊ ငွေကြေး ဖောင်းပွလာခြင်း စရေ မလိုလားအပ်တေ ဆိုးကျိုးတိကို ဖြစ်ပေါ်စီခသည်။

ရီနံခွန်မျှဝီရေးသည် နိုင်ဂျီးရီးယားနိုင်ငံ၏ ငွေကြေးပေါ်လစီပိုင်းကို မရုန်းနိုင်မလွတ်နိုင် အခက်အခဲထဲကို ပို့ပလိုက်ပိုင် ဖြစ်စီသည်။ နိုင်ငံ၏ ငွေကြေးထက်ဝက်ကျော်ကို ဖြန့်ဝီပီးပလိုက်တေအတွက်ကြောင့် ဖယ်ဒရယ်အစိုးရမှာ နိုင်ငံ့စီးပွားရေးလမ်းစိုင်တိကို အကောင်အထည်ဖော်ရေအခါမှာ အခက်အခဲတိအများကြီး တွိလာရသည်။

အဖြစ်သင့်ဆုံးက ပြည်နယ်နာင့်ဒေသခံအစိုးရတိကို ပီးရေ ဘဏ္ဍာရေးအရင်းအမြစ်တိရေ ရီနံဈီးအတက်အကျ၏ ရိုက်ခတ်မှုတိက ကင်းဝီးနိန်ရမည်။ ယင်းအစိုးရတိသည်လည်း လက်ခံရဟိရေ ဘဏ္ဍာရေးအရင်းအမြစ်တိကို ထိထိရောက်ရောက်သုံးစွဲနိုင်ရေ အရည်အချင်း ဟိနိန်ရမည်။ တနည်းအားဖြင့်ပြောရကေ အေပိုင် အတက်အကျဟိတတ်တေ အခွန်ငွေတိကို ဗဟိုအစိုးရကနိန် အလွဲအပြောင်းလုပ်ပြီးကေ မျှဝီစွာထက် ဒေသခံအစိုးတိ၏ ပြည်သူ့ဝန်ဆောင်မှုလုပ်ငန်းတိကို အတတ်နိုင်ဆုံး လုပ်ဆောင်ပီးနိုင်ရေ၊ တည်ငြိမ်မှုဟိရေ ဘဏ္ဍာငွေ ပီးအပ်မှု စနစ်ကို ကျင့်သုံးသင့်ပါသည်။

ရရှား
ရရားနိုင်ငံမှာ ရီနံနာင့် သဘာဝဓာတ်ငွေ့က ရဟိရေ အခွန်ငွေတိသည် အသင့်အတင့်များသည်။ ဖယ်ဒရယ်အစိုးရအဆင့်မှာဆိုကေ ရီနံတစ်ခုတည်းက ရဟိရေအခွန်သည် စုစုပေါင်းအခွန်၏ ၂၅ ရာခိုင်နှုန်းနီးပါး၊ ရီနံနာင့် သဘာဝဓာတ်ငွေ့နှစ်ခုပေါင်းက ရဟိရေ အခွန်သည် ၄၅ နာင့် ၅၀ ရာခိုင်နှုန်းကြား ဟိသည်။ ယင်းအထဲမှာ ရီနံနာင့် သဘာဝဓာတ်ငွေ့လုပ်ငန်းက ရဟိရေ အမြတ်ခွန် (profit taxes)၊ Value Added Tax (VAT)၊ ပြည်တွင်းထုတ်ကုန်ခွန် (excises)၊ ပို့ကုန်ခွန်နာင့် မြီထွက်အရင်းအမြစ်ခွန် (resource mineral taxes)တိ ပါဝင်ကြောင်း သိဟိရသည်။ အခွန်အများစုကို ဖယ်ဒရယ်အစိုးရက ကောက်ခံပြီးကေ ရဟိစွာအခွန်တိကို ဒေသခံအစိုးရတိနာင့် အတိုင်းအတာတစ်ရပ်အထိ မျှယူဂတ်သည်။ မျှယူစွာမှာလည်း တခါတလီညှိုပြီးကေ တွက်ချက်ခွဲဝီဂတ်တေပိုင် တခါတလီလည်း တရသီနှုန်း (fixed rate)အတိုင်း ခွဲဝီဂတ်သည်။ ယေကေလေ့ သဘာဝ အရင်းအမြစ်ခွန် (natural resources taxes)တိကို ဒေသခံအစိုးရတိက အဓိက ကောက်ခံသည်။ ယင်းအခွန်သည် ရီနံထွက်ဒေသတိ၏ အရေးကြီးရေ အခွန်ဝင်ပေါက် တစ်ခုလည်း ဖြစ်သည်။ ယင်းအခွန်ထဲမှာ ရီနံထုတ်လုပ်ရေး ပိုင်ရှင်ကြေး (royalties)၊ မြီထွက်သယံဇာတသိုက်တိ သုံးခ နာင့် ရှာဖွေခ(Exploration Tax) စရေ အခွန်အမျိုးအစားတိ ပါဝင်သည်။

ရီနံစရေ သဘာဝ အရင်းအမြစ်တိရေ နိန်ရာတချို့မှာရာ စုပြုံတည်ဟိနိန်တတ်တေအတွက်ကြောင့် ရီနံထွက်ဒေသခံအစိုးရတိကို အခွန်ကောက်ခံခွင့်ပီးခြင်းသည် နိုင်ငံတွင်း အခွန်ဝင်ငွေ မညီမျှမှုတိကို ဖြစ်ပေါ်စီသည်။ ၁၉၉၇ ခုနှစ်စာရင်းတိအရ စုစုပေါင်းလူဦးရေ၏ ၅ ဒသမ ၅ ရာ နိန်ထိုင်ရေ အချမ်းသာဆုံး ဒေသ ၅ ခုသည် ဒေသခံအစိုးရတိအားလုံးပေါင်းဝင်ငွေ၏ ၅၃ ရာခိုင်နှုန်းကို ရဟိခသည်။

သဘာဝအရင်းအမြစ် ပေါကြွယ်ရေ ဒေသတိက သူရို့ဒေသက သယံဇာတတိကို လက်ရှိအခြေအနေထက် ပိုပြီးကေ ထိန်းချုပ်လုပ်ကိုင်ချင်နိန်ဂတ်သည်။ အခြားတဘက်မှာလည်း စီးပွားရေးဆိုင်ရာ သုံးသပ်ချက်တိက နိုင်ငံတွင်း ညီမျှမှုတိကို ဖန်တီးပီးနိုင်အောင် ဗဟိုဖယ်ဒရယ်အစိုးရကနိန်ပြီးကေ ရီနံခွန် ကဏ္ဍကို အေထက်ပိုလို့ ထိန်းချုပ်လားဖို့စွာကို လိုလားဂတ်သည်။ နိုင်ဂျီးရီးယားနိုင်ငံပုံစံပိုင် ကောက်ခံရဟိရေ ရီနံခွန်မျှဝီခြင်းရေ ရရှားနိုင်ငံအတွက်လည်း အကောင်းဆုံး အဖြေ မဖြစ်နိုင်ကြောင်း သုံးသပ်ရသည်။ ဒေသတွင်း ထုတ်လုပ်ခွန် (production excises) စရေ အခွန်ဝင်ပေါက်တိကို ဒေသခံအစိုးရတိကို တာဝန်ခွဲအပ် ကောက်ခံခိုင်းခြင်းနာင့် အားကိုးလောက်တေ ငွေကြေးလွဲပြောင်းမှုပုံစံတိကို သုံးစွဲခြင်းရို့ကရာ ရီနံဈီးအတက်အကျ ဂယက်ကို ပိုပြီးကေ ခံနိုင်ပြီးကေ ခိုင်မာရေ ဘဏ္ဍာရေးစနစ်တစ်ခုကို ဖန်တီးပီးနိုင်မည်ဟု သုံးသပ်ရသည်။

ဗင်နီဇွဲလား
ရီနံခွန်သည် ဗင်နီဇွဲလားနိုင်ငံ ဗဟိုအစိုးရ၏ ကြီးမားရေ အဓိက အခွန်ဝင်ပေါက်တစ်ခုဖြစ်သည်။ ၁၉၉၇-၂၀၀၀ ခုနှစ်စာရင်းတိအရ စုစုပေါင်းအခွန်ငွေ၏ ပျမ်းမျှ ၄၇ ရာခိုင်နှုန်းဟိသည်။ တနည်းအားဖြင့် နိုင်ငံ GDP၏ ၉ ရာခိုင်နှုန်းနာင့် ညီမျှသည်။ ယင်းအခွန်တိထဲမှာ ပိုင်ရှင်ကြေး၊ ၀င်ငွေခွန် (income taxes)၊ ဗဟိုအစိုးရက ရဟိရေ ရှယ်ယာတိ၏ အမြတ်(dividends)တိလည်း ပါဝင်သည်။

ဒေသခံအစိုးရတိသည် ဗင်နီဇွဲလားနိုင်ငံ၏ ငွေကြေးပေါ်လစီကဏ္ဍမှာ အရေးကြီးရေ နိန်ရာက ပါဝင်နိန်သည်။ ဒေသခံအစိုးရတိသည် ဗဟိုအစိုးရသုံးငွေ၏ သုံးပုံတစ်ပုံခန့်ကို သုံးစွဲဂတ်သည်။ အခွန်ငွေအများစုသည် ဗဟိုအစိုးရ၏ အခွန်မျှဝီရေးအစီအစိုင်တိက လာရေအတွက်ကြောင့် ဗဟိုအစိုးရအပေါ်မှာ အများကြီးမှီခိုနိန်ရသည်။ ဒေသခံအစိုးရ ရဟိရေ အခွန်ငွေ၏ ထက်ဝက်ခန့်(ခန့်မှန်းခြေ) ကို ရီနံက ရဟိသည်။ ဒေသခံအစိုးရတိသည် စုစုပေါင်းရဟိရေ Value Added Taxes (VAT)၏ ၁၅နာင့် ၂၀ ရာခိုင်နှုန်းကြားအပါအ၀င် တခြားအခွန်ဝင်ပေါက်တိကနိန်တဆင့် စုစုပေါင်းအခွန်ငွေ၏ ၂၀ နာင့် ၂၅ ရာခိုင်နှုန်းကြားကို ရဟိသည်။ ယင်းအပြင် စုစုပေါင်းရဟိရေ ပိုင်ရှင်ကြေး(royalties)၏ ၂၀ နာင့် ၃၀ ရာခိုင်နှုန်းကြားကိုလည်း ဒေသခံအစိုးရတိက ဗဟိုအစိုးရကနိန်ရဟိသည်။

အခွန်ငွေမျှဝီခြင်း အစီအစိုင်တိသည် နိုင်ငံရေးနာင့် ငွေကြေးဆိုင်ရာ အငြင်းပွားမှုတိကို အမြဲတစေ ဖြစ်စီသည်။ ဒေသခံအစိုးရတိကို ပီးနိန်ရေ အခွန်ငွေသည် များလွန်းသည်လို့ ဗဟိုအစိုးရက ထင်သည်။ ပီးလိုက်တေ အခွန်ငွေကို ဒေသခံအစိုးရတိက အကျိုးရှိရှိ မသုံးလို့ ဗဟိုအစိုးရက ထင်နိန်သည်။ ဗဟိုအစိုးရက ယင်းအခွန်ငွေတိအပေါ်မှာ ပိုပြီးကေ ထိန်းချုပ်ကြိုးကိုင် လုပ်လိုသည်။ အခြားတဘက်မှာလည်း ပြည်နယ်နာင့်ဒေသခံအစိုးရတိက ဗဟိုအစိုးရဘားကနိန်ပြီးကေ အခွန်ငွေဝီစုကို အေထက်မက ပိုရချင်သည်။

ယူအေအီး (United Arab Emirates)
ယူအေအီးပြည်ထောင်စုနိုင်ငံကို ၁၉၇၁ ခုနှစ်မှာ ဒေသ ၇ ခုနာင့် တည်ထောင်ခပါသည်။ ဒေသတစ်ခုစီမှာ သူ့ မူဆလင် ဂေါင်းဆောင်နာင့်သူဟိပြီးကေ စီးပွားရေး နာင့် နိုင်ငံရေး လွတ်လပ်ခွင့်တိ အထိုက်အလျောက် ဟိသည်။ ကိုယ့်ဒေသကထွက်ဟိရေ ရီနံတိအပေါ်မှာလည်း ကိုယ်ပိုင်အုပ်ချုပ်ကိုင်တွယ်ခွင့် ဟိသည်။ ၁၉၉၇-၂၀၀၀ ခုနှစ်စာရင်းတိအရ နိုင်ငံတစ်ခုလုံးက ကောက်ခံရဟိရေ အခွန်စုစုပေါင်း၏ ထက်ဝက်ခန့်ကို ရီနံနာင့် သဘာဝဓာတ်ငွေ့ကဏ္ဍက ရဟိသည်။ တနည်းအားဖြင့် နိုင်ငံGDP၏ ၁၈ ရာခိုင်နှုန်းနာင့် ညီမျှသည်။

သက်ဆိုင်ရာ ဒေသအစိုးရတိသည် ရီနံနာင့် သဘာဝဓာတ်ငွေ့ခွန်တိကို ပိုင်ရှင်ကြေး၊ ကုမ္ပဏီအမြတ် လွဲပြောင်းမှု (Company Profit Transfers)၊ ၀င်ငွေခွန် ဖြတ်ပိုင်း (Income Tax Receipts)တိကနိန်တဆင့် ရဟိသည်။ နိုင်ငံ၏ အကြီးမားဆုံးဒေသဖြစ်တေ အဘူ ဒါဘီ (Abu Dhabi)ဆိုကေ ၁၉၉၇ နာင့် ၂၀၀၀ကြားမှာ
ဒေသအခွန်ငွေစုစုပေါင်း၏ ပျမ်းမျှ ၅၈ ရာခိုင်နှုန်းကို ရီနံစိမ်းပိုင်ရှင်ကြေး (crude oil royalties)နာင့် တခြားအခွန်တိကနိန်တဆင့် ရဟိသည်။

ဖယ်ဒရယ်အစိုးရသည် အပိုင်း(၁)မှာ ဖော်ပြခရေပိုင် အောက်ကနိန်အထပ်ကိုတက်လားရေ အခွန်မျှဝီခြင်း စနစ်ကို ကျင့်သုံးသည်။ တနည်းအားဖြင့်ပြောရကေ အဘူဒါဘီ၊ ဒူဘိုင်း(Dubai)၊ ရှာဂျ(Sharjah)စရေ ရီနံထုတ်လုပ်တေ ဒေသတိက ဗဟိုအစိုးရကို ဖဲ့ချာ(cash)သတ်သတ်သော်လည်းကောင်း၊ ဖဲ့ချာနာင့် တခြားပံ့ပိုးမှုတိပေါင်းပြီးကေသော်လည်းကောင်း ပီးဆောင်ဂတ်သည်။ ဖယ်ဒရယ်အစိုးရသည် အခွန်ငွေ သုံးပုံ နှစ်ပုံခန့်ကို ယင်းပိုင် ပီးဆောင်ခြင်းတိ၊ ၀န်ဆောင်မှုလုပ်ငန်းတိစီစိုင်ပီးခြင်းတိက ရဟိသည်။ (ဗဟိုအစိုးရအခွန်ဝင်ငွေ၏ သုံးပုံနှစ်ပုံသည် ရဟိရေ နှစ် အပေါ်မှာ မူတည်ပြီးကေ အဘူဒါဘီဒေသ ရီနံခွန်၏ ၆၀ နာင့် ၁၀၆ ရာခိုင်နှုန်းကြားမှာ ဟိတတ်သည်။) ဖယ်ဒရယ်အစိုးရအတွက် ပီးရဖို့အခွန်ပမာဏအတိအကျကို နှစ်စိုင် ဖယ်ဒရယ်အစိုးရနာင့် ဒေသအာဏာပိုင်အစိုးရတိကြားမှာ အမြဲတမ်းညှိပြီးကေ ဒေသအာဏာပိုင်အစိုးရတိက ပီးဆောင်ဂတ်သည်။ ဖယ်ဒရယ်အစိုးရသည် တည်ငြိမ်မှုဟိရေ အခွန်ငွေ အများကြီးကို ပိုင်ဆိုင်ရေအတွက်ကြောင့် ရီနံဈီးအတက်အကျဟိကေလေ့ အခွန်မျှဝီခြင်းလုပ်ငန်းစိုင်တိက အခက်အခဲမဟိပဲ လျောမွေ့နိန်တတ်စွာကို တွိဟိရပါသည်။

*အပိုင်း (၄)ကို ဆက်လက်ဖတ်ရှုပါရန်။