အရက်အကြောင်း တစေ့တစောင်း (၂)

အရက်ဆိုးကျိုး သို့မဟုတ် နောက်ဆက်တွဲဇာတ်လမ်းတိ
အရက်၏ဆိုးကျိုးတိရေ လူ့သွီးထဲမှာအရက်ဇာလောက်ဟိနိန်လဲ အပေါ်မှာ မူတည်ပြီးကေ ကွဲပြားပါရေ။ အထက်က ဖော်ပြခရေပိုင် သောက်တေ အရက်ပမာဏချင်းတူကေလေ့ အရက်မူးပုံချင်းက မတူရေအတွက် ကြောင့် ချင့်ချိန်သောက်စွာက ပိုကောင်းပါရေ။ ယောက်ကျားဆိုကေ ၁၂ အောင်စဟိရေ ဘီယာ တစ်လုံး၊နှစ်လုံးသောက်ကေ မဆိုးပါ။ မိန်းမဆိုကေ တစ်လုံးထက် ပိုမသောက်သင့်ပါ။ အရက်သောက်စွာ များလီ၊ သွီးကြောထဲမှာ အရက်ဓာတ်ပိုများလီ၊ လူတိကို ဆိုးကျိုးပိုဖြစ်လီပါပျာယ်။ အထက်မှာ ဖော်ပြထားရေပုံနှစ်ပုံကို နှိုင်းယှဉ်ကြည့်လိုက်ကေ အရက်၏ ဦးဏှောက်အပေါ်မှာ ဖြစ်ပေါ်ဇီရေ ဆိုးကျိုးကို မြင်ရဖို့ဖြစ်ပါရေ။ အရက်သောက်စွာများရေလူမှာ ဦးဏှောက်ဆဲလ်တိက သာမန်လူထက် ထိခိုက်ပျက်စီးမှု ပိုများနိန်စွာကို တွိရပါရေ။ အစာအိမ်ထဲမှာ အစာမဟိဘဲ သောက်စွာရို့၊ နာရီပိုင်းအတွင်းမှာ အရက်ကို အလွန်အကျွံသောက်ခြင်းတိရေ သွီးကြောထဲမှာ အရက်ဓာတ် များခြင်းကို ချက်ချင်းတိုးဇီနိုင်ရေအတွက် ယင်းလုပ်ရပ်တိကို ရှောင်ကြဉ်သင့်ပါရေ။

အရက်ကြောင့်ဖြစ်တေ လတ်တလော ဆိုးကျိုးတိကိုတော့ လူတိတော်တော်များများ သိကတ်ပါဖို့။ ရေရှည်ဆိုး ကျိူးကိုရာ သိရေလူ နည်းကတ်ပါရေ။ အရက်သောက်ခြင်းက ဦးဏှောက်ကိုထိခိုက်စီပြီးကေ လတ်တလော အဖြစ် စကားထစ်ခြင်း၊ လုပ်ပုံကိုင်ပုံ ဗရမ်းဗဒါ ဖြစ်ခြင်း၊ ကိုယ်ပိုင်းဆိုင်ရာ တုံ့ပြန်မှု နည်းကွေးခြင်းတိကို ဖြစ်စီနိုင်ပါ ရေ။ အရက်ကနိန်ပြီးကေ ဦးဏှောက်ထဲမှာ ဟိရေ inhibitory centersလို့ခေါ်ရေ ထိန်းချုပ်မှု လုပ်ဆောင်ရေ နိန်ရာတိကို ချုပ်ကိုင်မှုတိ လျော့ချလိုက်တေအတွက် စိတ်ကလျော့ရဲလားပြီးကေ အပြောအဆိုရဲတင်းလာခြင်း၊ တက်ကြွလာခြင်းစရေ အမူအရာတိကိုလည်း ဖြစ်ပေါ်ဇီပါရေ။ တစ်ခုခုကို သတိထားနိုင်မှုလည်း အားနည်းလားပါရေ။ မူးဝေလာပြီးကေ ပုံမှန် မြင်နိုင်အားလည်း ကျဆင်းလာပါရေ။ ယင်းအပြင် အိပ်ငိုက်ခြင်း၊ မှတ်ဥာဏ်အားနည်းလာခြင်း၊ နာလို့ နာမှန်းမသိခြင်း၊ အော့အန်ခြင်း၊ လမ်းမလျှောက်နိုင်တော့ခြင်း၊ အမှတ်တမဲ့ဖြစ်လာခြင်း၊ သတိမေ့ခြင်း၊ အသက်ရှုမှု နှေးကွေးလာခြင်း၊ နှလုံးခုန်မှု နှေးကွေးလာခြင်း၊ အသက်ဆုံးရှုံးရခြင်း စရေ ဆိုးကျိုးတိကို ဖြစ်ပေါ်ဇီနိုင် ပါရေ။

ခန္ဓာကိုယ်ထဲကို ရောက်လားခရေ အရက်က အင်ဆူလင်(Insulin)တိထုတ်လုပ်မှုကို မြန်ဇီပြီးကေ သွီးထဲမှာ သကြားဓာတ်နည်းခြင်းတိကိုလည်း ဖြစ်ပေါ်ဇီနိုင်ပါရေ။ ယင်း၏အကျိုးဆက်အဖြစ် စိတ်တိုတတ်ခြင်းကို ဖြစ်ဇီပါရေ။ အဆိုးဆုံးအခြေအနေမှာဆိုကေ ဆီးချိုရောဂါနာင့်တောင် သီကျလားနိုင်ပါရေ။ အရက်ရေ အရီပြားနားမှာဟိရေ သွီးကြောတိကို ကျယ်ဇီပါရေ။ ယင်းအတွက်ကြောင့် အရက်သောက်ရေလူရေ နွီးလာပြီးကေ ချွေးတိထွက်လာတတ်ပါရေ။ ယင်းပိုင်ဖြစ်ခြင်းက ခန္ဓာကိုယ်ထဲက အပူချိန်ကို လျော့ကျဇီပြီးကေ ချမ်းလာတတ်ပါရေ။ ယင်းအတွက်ကြောင့် အီးလို့ ခန္ဓာကိုယ်နွီးအောင် အရက်သောက်တေ ဆိုစွာရေ မှားယွင်းရေ အတွေးအခေါ်တစ်ခုဖြစ်ပါရေ။ ကိုယ့်အတွက် ကောင်းကျိုးထက် ဆိုးကျိုးတောင် ဖြစ်နိုင်ပါရေ။

အရက်သောက်ခြင်းရေ အစာအိမ်လမ်းကြောင်းကို အများကြီး ထိခိုက်ဇီပါရေ။ အရက်အလွန်အကျွံသောက်ပြီး လို့ တစ်ရက်နှစ်ရက်ကြာလာရေခါ အသည်း ဆဲလ်တိမှာ အဆီတိ စုလာတတ်ပါရေ။ ဆက်ပြီးကေ ရေရှည် သောက်ကေ အသည်းရောင်စွာတိဖြစ်တတ်ပါရေ။ ယင်းအကျိုးဆက်အဖြစ် hepatitisကို ဖြစ်ဇီပြီးကေ မကြာခဏ ဆေးရုံတက်ရခြင်း၊ အသက်ဆုံးရှုံးခြင်းတိကို ဖြစ်ပေါ်ဇီနိုင်ပါရေ။ တကယ်လို့ အရက်သောက်စွာကို ရပ်လိုက်ကေ အသည်းမှာ အဆီဖုံးစွာတိ၊ hepatitisတိကို ပြန်ပြီးကောင်းနိုင်ဇီပါရေ။ တကယ်လို့မရပ်ပဲ ဆက်သောက်ကေတော့ခါ အသည်းဆဲလ်တိကို တဖြည်းဖြည်းပျက်စီးဇီပါဖို့။ ပျက်စီးလားခရေ အသည်းဆဲလ် တိနိန်ရာကို အမာရွတ် တစ်ရှူးတိက အစားထိုးဝင်လာပါဖို့။ ယင်းဖြစ်စိုင်ကို cirrhosisလို့ခေါ်ပါရေ။ cirrhosis ဖြစ်ပြီးရေ နောက်ပိုင်းမှာဆိုကေ တဖြည်းဖြည်းနာင့် ခန္ဓာကိုယ်က အရက်ကို လက်မခံနိုင်ပဲဖြစ်လာပါဖို့။ ၂၀၀၄ ခုနှစ် စာရင်းအရ cirrhosis ရေ အမေရိကန်ပြည်ထောင်စု၏ ၁၂ခုမြောက် လူသီအများဆုံး ရောဂါတစ်ခု ဖြစ်ပါ ရေ။

တချို့ဆိုကေ cirrhosisလက္ခဏာကို အရက်တစ်နိန့် သုံး၊ လေးခွက်ပုံမှန် သောက်လို့ နှစ်ပေါင်းနည်းနည်း ကြာလာစွာနာင့် ပြလာပါရေ။ အရက်စွဲနိန်ရေလူရေ hepatitis C virus (HCV)ကူးစက်ဖို့ ကောင်းလွယ်ပါရေ။ ယင်းချင့်ကို သတိထားမဆင်ခြင်ဘဲ အရက်ကို အလွန်အကျွံ ထပ်သောက်ကေ cirrhosis နာင့် အသည်းကင်ဆာ ဖြစ်နိုင်ခြေကို ပိုတိုးဇီပါဖို့။ cirrhosis ၏ လက္ခဏာတချိူ့ကတော့ အရေပြားနာင့် မျက်လုံးထဲက အဖြူထည်တိ ၀ါလာခြင်း၊ နှလုံး၏ အ၀ီးဆုံးနိန်ရာမှာ ဟိနိန်ကတ်တေ ခန္ဓာကိုယ်အစိတ်အပိုင်းတိ (ဥပမာ-လက်၊ ခဖျား၊ နှာခေါင်း) နာင့် ၀မ်းတိမှာ အရည်တိ စုစည်းလာခြင်းရို့ ဖြစ်ပါရေ။ cirrhosis ဟိမှန်းသိယင့်သားနာင့် အရက်ကို ဆက်သောက်ကေ ယင်းလူရေ နောက်ထပ် ၅ နှစ်နာင့်အထက် အသက်ရှင်နိုင်ခြေက ၅၀ ရာခိုင်နှုန်းရာ ဟိပါဖို့။

စိတ်ပူတတ်တေလူတိအတွက် အရက်တစ်ခွက်နှစ်ခွက်သောက်ကေ လိင်ပိုင်းဆိုင်ရာဆက်ဆံမှုကို သွက်လက်ဇီပါရေ။ ယေကေလေ့ စိတ်လွတ်ကိုယ်လွတ်ဖြစ်ပြီးကေ မလိုလားအပ်တေ လူမှုဒုက္ခတိကို ဖြစ်ပေါ်ဇီ နိုင်ပါရေ။ အများကြီးသောက်ကေတော့ခါ ယောက်ကျားတိအတွက် လိင်ပိုင်းဆိုင်ရာ နိုးကြားမှု ကို လျော့နည်းဇီပါရေ။ မိန်းမတိအတွက်လေ့ လိင်အင်ဂါရပ်ပိုင်းဆိုင်ရာ ခန်းခြောက်မှုတိကို ဖြစ်ပေါ်ဇီပါရေ။ အရက်ကို နှစ်ရှည်လများ အလွန်အကျွံသောက်တေ ယောက်ကျားတိအတွက်တော့ Testicular atrophy(shrinking) ကို ဖြစ်ပေါ်ဇီပါရေ။

အရက်စွဲနိန်ရေ လူတစ်ယောက်ရေ သာမန်လူထက် ကင်ဆာဖြစ်ဖို့ ရာခိုင်နှုန်း ၁၀ ဆ ပိုရေလို့ သိရပါရေ။ အရက်သောက်ခြင်းရေ ပဇကင်ဆာ၊ အသည်းကင်ဆာ၊ လိုင်ဖားကင်ဆာ၊ နခမ်းကင်ဆာ စရေ ကင်ဆာရောဂါအမျိုးမျိုးကို ဖြစ်ပေါ်ဇီနိုင်ပါရေ။ အလွန်အကျွံသောက်ကတ်တေလူတိမှာ အသည်းကင်ဆာ အဖြစ်များပါရေ။ အရက်ကို တစ်နိန့်နှစ်ခွက်ထက်ပိုသောက်တေလူတိရေ သည်းခြေ ကင်ဆာဖြစ်နိုင်ခြေကို ၂၂ ရာခိုင်နှုန်း တိုးဇီရေလို့ သိရပါရေ။ မိန်းမတိမှာဆိုကေလည်း တစ်နိန့်ကို အရက် သုံးခွက်ကျော်ပုံမှန်သောက်ကေ နို့ကင်ဆာဖြစ်ဖို့ ရာခိုင်နှုန်းကို နှစ်ဆ တိုးဇီရေလို့လည်း သိရပါရေ။

တိုးတက်တေနိုင်ငံတိမှာဆိုကေ အရက်သောက်ပြီးကေ ကားတိုက်ကားမှောက်လို့ တစ်နှစ်တစ်နှစ်မှာ လူတိ အများကြီး သီကတ်ရပါရေ။ တဒင်ဂ ပျော်ရွှင်မှုကြောင့် တစ်ခုလေ့ မဆိုင်ရေ တခြားမိသားစုတိ၏ အဖ၊ အမိ၊ ညီကိုမောင်နှမတိ သီကတ်ရပါရေ။ ၂၀၀၅ခုနှစ်စာရင်းတိအရ အမေရိကန်ပြည်ထောင်စုမှာ အရက်သောက် ပြီးကေ ဖြစ်တေ ယဉ်တိုက်မှုရေ ၂ သိန်း ၅ သောင်း ၀န်းကျင်ဟိပါရေ။

အရက်ကြောင့် တစ်နှစ်ကို ရခိုင်ပြည်မှာ လူဇာနှစ်ယောက်သီလဲ ဆိုစွာကိုတော့ ကောက်ယူထားရေ စစ်တမ်းတိမဟိလို့တော့ မသိနိုင်ပါ။ ယေကေလေ့ သေချာစွာကတော့ တိုးတက်တေ နိုင်ငံတိထက် အသက်ဆုံးရှုံးရေ ရာခိုင်နှုန်း ပိုများ ပါဖို့။ ဇာကြောင့် အေပိုင်ပြောရလဲဆိုစွာက အကြောင်းဟိပါရေ။
၁။ ရခိုင်ပြည်မှာ သောက်သုံးနိန်ကတ်တေ အရက်တိရေ သန့်စင်မှုမဟိခြင်း၊ အတုတိ ဈေးကွက်ထဲမှာ ဟိခြင်း၊
၂။ ရခိုင်သားတိ အရက်သောက်စွာမှာ အနောက်နိုင်ငံတိမှာပိုင် တခြားအရည်တိနာင့် ရောစပ်ပြီးကေ သောက်သုံးမှုနည်းခြင်း၊ အရက်အကြမ်းကို တိုက်ရိုက် သောက်သုံးခြင်းတိ ပိုများခြင်း၊
၃။ တခြားနိုင်ငံတိမှာပိုင် အရက်သောက်နိုင်ရေ အသက်ကန့်သတ်ထားခြင်း မဟိခြင်း၊ ယင်းအတွက်ကြောင့် အရက်စသောက်တေ အသက်အရွယ်ရေ ရခိုင်ပြည်တွင် ပိုငယ်ခြင်း၊
၎။ အရက်သောက်လို့ ဖြစ်လာရေ ရောဂါလက္ခဏာတိကို အချိန်မှီ ပြသမှုနည်းခြင်းနာင့် ပြသရန် ငွေကြေးမတတ်နိုင်ခြင်း၊
၅။ ကျန်းမာရေး ဗဟုသုတနည်းခြင်း စရေ အကြောင်းတိက ဟိနိန်ပါရေ။

အရက်သောက်ခြင်းအားဖြင့် မိအေးနှစ်ခါနာရုံမက သုံးလေးခါ နာဂတ်ရပါရေ။ အရက်သောက်ခြင်းကြောင့် အထက်မှာ တင်ပြခရေပိုင် သောက်တေလူမှာ နာစရာတိက ဒုနာင့်ဒေးပါ။ ယင်းပိုင်ပျာယ် အရက်သောက်လို့ မူးယမ်းပြီးကေ ကိုယ့်မယားနာင့် သားသမီးတိရှိမှာ ရန်ဖြစ်၊ အချေတိ ငိုရ စိတ်ဆင်းရ၊ မိသားစုတိ စိတ်မကောင်းဖြစ်ရ၊ အိမ်ထောင်ကွဲရ၊ သားသမီးတိအတွက် စံနမူနာထားစရာ အားကိုးစရာ လူတစ်ယောက် ဆုံးရှုံးရ၊ အရက်သောက်ပြီးကေ သီကျလို့ မယားမှာ အချေတစ်ဘက်နာင့် ရုန်းကန်ရ၊ အချေတိက ဖြစ်သင့်သလောက် ထူးချွန်သင့်သလောက် မထူးချွန်ရ။ ယင်းချင့်တိအားလုံးရေ လူမှုရေးရာ ဆုံးရှုံးမှုတိဖြစ်ပါ ရေ။ တချို့ဆုံးရှုံးမှုတိဆိုကေ တခုပိုင်လေ့ အစားထိုးလို့ မရရေ ဆုံးရှုံးမှုတိပါ။ ၂၀၀၅ခုနှစ်က အမေရိကန် ပြည်ထောင်စု၏ ”ဆီးဝါးအလွဲသုံးစားမှုနာင့် ကျန်းမာရေး အမျိုးသားစစ်တမ်း” (National Survey on Drug Abuse and Health) အရ အမေရိကန်ပြည်ထောင်စုအနိန်နာင့် အရက်ကြောင့် ဖြစ်ပေါ်ဇီရေ ကျန်းမာရေး၊ စီးပွားရေး၊ လူမူရေးကိစ္စတိကြောင့် တစ်နှစ်ကို ခန့်မှန်းခြေ ဒေါ်လာ ဘီလီယံ ၁၈၀ ၀န်းကျင်ဆုံးရှုံးရေလို့ သိရပါရေ။ ပြည်သူတစ်ဦးချင်းဇီ၏ ဆုံးရှုံးမှုရေ နိုင်ငံအတွက် ဆုံးရှုံးမှုလည်း ဖြစ်ပါရေ။ အလုပ်လုပ်ဖို့အချိန်မှာ အရက်သောက်မူးယမ်းနိန်ကေ နိုင်ငံ၏ကုန်ထုတ်လုပ်မှုကို ကျဆင်းဇီပါဖို့။ ယင်းလူပီးဆောင်ရေ ၀င်ငွေခွန် လည်း ကျဆင်းပါဖို.။ ယင်းလူဝင်ငွေနည်းလို့ သုံးစွဲစွာ ငွေနည်းလို့လည်း စီးပွားရေး လုပ်ငန်းတိကို ထိခိုက်ပါဖို့။ ယေချင့်တိရေ တစ်ဦးချင်းကြည့်လိုက်ကေ မဖြစ်စလောက်လို့ ထင်ရကေလေ့ အများကြီးပေါင်းပြီးကေ တွက်လိုက်ကေ ဆုံးရှုံးမှုက များပါရေ။ ကျနော်ရို့ရခိုင်ပြည်မှာပိုင် အဆင်မပြေကတ် တေကြားက ဖဲ့သာချေ နှစ်ပြားတခတ်ကို ကိုယ့်မိဖ၊ ကိုယ့်မယား၊ ကိုယ့်သားသမီးတိ အတွက် အ၀တ်တစ်ထည်ချေ၊ မုန့်တစ်ထုပ်ဝယ်ဖို့တစား အရက်သောက်လို့ ရောဂါဝယ်လိုက်ကေ ပိုတောင် ကိုယ်ကျိုးနည်းဂတ်ရပါဖို့။

တဘက်မှာလည်း အရက်သောက်တေ လူကို အရက်မသောက်ကဲ့ဝေးလို့ ပဇနာင့် အားဒမ ပြောရုံနာင့် မရပါ။
ယင်းလူတိ အရက်ဖြတ်ချင်လာအောင် လူထုအသိပညာပီး စီမံကိန်းတိ (Public Awareness Campaign)တိ လုပ်ကတ်ရပါဖို့။ အရက်ဖြတ်ချင်ရေ လူတိကို အစိုးရက ဆေးရုံတိမှာ အလကား (သို့) ဈေးနှုန်းတတ်နိုင် သလောက် အနည်းချေနာင့် ညွန်ကြားချက်တိ၊ အကြံပီးမှုတိ (consulting)တိ လုပ်ပီးရပါဖို့။ စိတ်ပိုင်းဆိုင်ရာ ပြုပြင်မှုတိ၊ ရင်ဖွင့်ဆွေးနွေးမှုတိ လုပ်နိုင်အောင် စိတ်ပညာရှင်တိကို ထားပီးရပါဖို့။ အလုပ်အကိုင်မဟိလို့ အလေလိုက်ပြီးကေ အရက်ဆိုင်မှာ အချိန်ဖြုန်းနိန်ကတ်တေ လူတိများနိန်ရေ ဆိုကေလည်း အစိုးရက တာဝန်သိသိ အလုပ်အကိုင်တိ ဖန်တီးပီးနိုင်အောင် ကြိုးစားရပါဖို့။ တချိန်တည်းမှာ အရက်သောက်ခြင်းအားဖြင့် ဖြစ်လာနိုင်ရေ ဆိုးကျိုးတိကို လူငယ်ချေတိ အရွယ်ရောက်ချိန် ၈ တန်း၊ ၉တန်းလောက်မှာ စာသင်ကျောင်းတိမှာ အသိပညာသင်ပီးစွာတိ၊ အရက်သောက်နိုင်ရေ အသက်ကန့်သတ်ချက်ဥပဒေ ထုတ်စွာတိ၊ ထုတ်ထားရေ ဥပဒေကို လိုက်နာမှုဟိအောင် ကြပ်မတ်ပီးစွာတိ ကိုလည်း လုပ်ဆောင်လားရဖို့ ဖြစ်ပါရေ။ ယင်းပိုင်ပျာယ် ဈီးကွက်မှာဟိရေ အရက်တိကို ရခိုင်ပြည်တွင်းကို သွင်းခွင့်လိုင်စင်မပီးခင် အစိုးရက ယင်းအရက်ကို ဓာတုဗေဒဆိုင်ရာ စမ်းသပ်ချက်တိပြုလုပ်ပြီးကေ အရည်အသွေးမပြည့်မီရေ အရက်တိကို ပိတ်ပင်တားဆီးပီးရပါဖို့။ ယင်းလုပ်ဆောင်ချက်တိအတွက် လိုအပ်တေ ငွေအင်အားကို ပြည်သူတိပါးက မတောင်းယူဇီပဲ လိုင်စင်ခွန်၊ အရက်ခွန် စရေ အခွန်တိပါးက သတ်သတ်ကောက်ခံပြီးကေ ပြည်သူတိ၏ ကျန်းမာရေးကို အလေးပီးကာကွယ်ရပါဖို့။ ယေမှရာ အရက်ကြောင့် ဆုံးရှုံးနိန်ရရေ ရခိုင်ပြည်၏ စီးပွားရေး၊ လူမှုရေး၊ ကျန်းမာရေး စရိတ်စက ယိုစီးမှုတိကို လျော့ချ နိုင်ဖို့ဖြစ်ပြီးကေ လင်နာင့် မယား၊ သားသမီးနာင့် အဖ တစုတစည်းတည်း နိန်ထိုင်နိုင်ပြီးကေ ကျန်းမာတိုးတက်တေ ရခိုင်ပြည်ကြီးကို တည်ဆောက်နိုင်ဖို့ ဖြစ်ပါကြောင်း .....

မှီငြမ်းချက်
1. Insel. Paul M.; Roth, Walton T.; Core Concepts in Health with Additional Readings from Georgia Institute of Technology, 10th Edition, Mc Graw Hill, New York, 2008.
2. HowStuffWorks, How Alcohol Works, , accessed January 1, 2010.
3. Wikipedia, Ethanol, , accessed January 1, 2010.
4. Wikipedia, Alcoholic beverages, , accessed January 1, 2010.
5. Wikipedia, Long-term effects of alcohol, , accessed January 1, 2010.

ဓာတ်ပုံ။ http://www.virtualmedicalcentre.com/uploads/VMC/DiseaseImages/495_alcoholism.jpg