ဆိုင်ကလုန်း ဂီရိ၏ ဒဏ်ခတ်သံ

နှစ်စိုင်နှစ်တိုင်း ဘင်္ဂလားပင်လယ်အော်မှာ ဆိုင်ကလုန်းမုန်တိုင်း ၅ လုံးလောက်စီ ဖြစ်ပေါ်တတ်ပြီးကေ အေနှစ်ခါတော့ အားလုံးသိကတ်တေအတိုင်း ဆိုင်ကလုန်း ဂီရိရေ ရခိုင်ပြည်ကို အောက်တိုဘာလ ၂၂ ရက်နိန့်က ၀င်ရောက်တိုက်ခတ်လို့ လားခပါရေ။ တစ်နာရီကို ကီလိုမီတာ ၁၇၀ ထိ လီတိုက်အားဟိခပြီးကေ ကမ်းရိုးတန်းဒေသတိမှာ ဒီရေ ၁၂ပေကျော်ထိ မြင့်တက်ခရေလို့ ဆိုပါရေ။ ကစ္ဆပနဒီ အရိဘက်ကမ်းက သေလာဂီရိရေ ရခိုင်သားတိအတွက် မွန်မြတ်လှစွာသော ဗုဒ္ဓဘာသာနန့် မင်္ဂလာအပေါင်းကို ဆောင်ကြဉ်းပီးသလောက် အေဂီရိကတော့ အမင်္ဂလာ အနိဌာရုံတိကိုရာ ဆောင်ကြဉ်းလာခပါရေ။ အပြစ်မဲ့ရခိုင်သူရခိုင်သားတိ ယင်းအမင်္ဂလာ၏ အကျိုးဆက်ကို ဆက်လက်ခံစားနိန်ရဆဲပါ။
ဆိုင်ကလုန်းဂီရိကတော့ ၀င်ရောက် တိုက်ခတ်ပြီးလို့ အားအင်လျော့ပါးလို့ လားခပါပျာယ်။ ယေကေလေ့ မုန်တိုင်းခံ ရခိုင်ပြည်သူတိ၏ ဒုက္ခကတော့ လျော့လို့မလားပါသိ။

အစိုးရ စာရင်းအရဆိုကေ မုန်တိုင်းဒဏ်ကြောင့် လူပေါင်း ၁ သိန်း ၂ သောင်းလောက် အိုးမဲ့အိမ်မဲ့ဖြစ်ကတ်ရရေလို့ဆိုပါရေ။ အစိုးရက လူပေါင်း ၄၅ ယောက်အနည်းဆုံး သီရေလို့ ပြောကေလေ့ ဒေသခံတိအဆိုအရ မြေပုံတစ်မြို့တည်းမှာပင် အနည်းဆုံး လူ ၁၀၀ ၀န်းကျင် သီလားရေလို့ ဆိုပါရေ။ စိုက်ပျိုးထွန်ယက်မြေ ဧကပေါင်း ၁ သောင်း ၇ ထောင် ၅ ရာ၊ ငါးပုစွန်ကန် ဧကပေါင်း ၅ သောင်း ၀န်းကျင် ပျက်စီးကတ်ရရေလို့ ကုလသမဂ္ဂ၏ လူသားချင်း စာနာကူညီရေး အဖွဲ့ကြီး OCHA က သူ့၏ နိုဝင်ဘာလ ၃၀ ရက်နိန့်က ထုတ်တေ အစီရင်ခံစာမှာ ဖော်ပြထားပါရေ။ ငါးဖမ်းဘုတ်တိ၊ ကျွဲနွားတိ၊ တာတမံတိ၊ အိုးအိမ်ကျောင်းအဆောက်အအုံ စရေ တခြား ပစ္စည်းဥစ္စာ ဆုံးရှုံးမှုတိကလည်း အများကြီးပါ။ အေချင့်တိက မုန်တိုင်းခံပြည်သူတိကို ရေရှည်နလံထူရခက်စီရေ ဆုံးရှုံးမှုတိ ဖြစ်ပါရေ။

ချစ်စရာ့ ရက္ခိတစိတ်
မုန်တိုင်းတိုက်ခတ်ပြီးလို့ နှစ်လထဲကို ရောက်လာကေလေ့ မုန်တိုင်းခံ ပြည်သူအများစုကတော့ နဂိုအခြေအနေကို မရောက်နိုင်ပါသိ။ စားဖို့သောက်ဖို့အတွက် နိုင်ငံတကာNGOတိ၊ ရခိုင်လူမှုအဖွဲ့အစည်းတိ၊ ဘုန်းကြီးကျောင်းတိကို အားကိုးနိန်ရတုန်း ဖြစ်ပါရေ။ ရခိုင်သဟာယအသင်းကဆိုကေ မုန်တိုင်းတိုက်ပြီး ၂၄ ရက်ကနိန် ဆန်တိ ၀ီပီးခပါရေလတ်။ နောက်ပိုင်းမှာ ကမ္ဘာ့စားနပ်ရိက္ခာအဖွဲ့(WFP) စရေ အဖွဲ့တိက ဆန်တိကို ၀ီပီးလာကတ်ပါရေလတ်။ အကူအညီပီးနိန်ရေ လူတစ်ယောက်၏နောက်ဆုံးစာရင်းအရ WFPမှာ ၀ီစရာ ၃လစာ ဆန် ဟိသိရေလို့ ဆိုပါရေ။ ယင်းပိုင်ပျာယ် အခင်ကြီးဦးအေးသာအောင်ဦးဆောင်ရေ ALDအဖွဲ့ကလည်း အကူအညီတိကို ကိုယ်တိုင်ဆင်းပြီးကေ ပီးကတ်ပါရေ။ နိုင်ငံတကာရခိုင်အမျိုးသားအသင်း WAOကလည်း သိန်းပေါင်း ၃၀၀ ကျော်ရေ ရံပုံငွေတိကို ကောက်ခံလို့ ကူညီပီးနိန်ပါရေ။ ယင်းပိုင်ပျာယ် တခြားအဖွဲ့အစည်းတိလည်း အများကြီးပါ။ ကျောက်ဖြူက ဒေသခံအဖွဲ့တစ်ခုဆိုကေ ရခိုင်ပြည်နယ်နိန့်လုပ်ဖို့အတွက် စီစိုင်နိန်စွာကနိန် မုန်တိုင်းဝင်လာလို့ ဒုက္ခရောက်ကတ်စွာနန့် လီဘေးကယ်ဆယ်ရေး လုပ်ငန်းဘက်ကို ပြောင်းပြီးကေ လုပ်လားခကတ်တေလို့ သိရပါရေ။

အေပိုင် အရေးကြီးရေခါ အားလုံး ၀ိုင်းပြီးကေ ကူညီကတ်စွာရေ ချစ်စရာ ရက္ခိတစိတ်ဓာတ်ချေပါ။ ရခိုင်ပြည်သူတိအတွက် ဆိုရေ ဦးတည်ချက်နန့် အားလုံးသော ရခိုင်အဖွဲ့အစည်းတိက မကြုံစဖူး ရံပုံငွေကောက်ခံ ကူညီမှုရေ အေတစ်ကြိမ် အများဆုံးဟိပါဖို့။ ယေကေလေ့ လူမှုအဖွဲ့အစည်းတိရေ လူများ၏ အလှူငွေပေါ်မှာ မှီပြီးကေ ပံ့ပိုးရစွာဖြစ်ရေအတွက်ကြောင့် နောက်ထပ်ဇာလောက် ကြာရှည်ထောက်ပံ့နိုင်ဖို့လဲ ဆိုစွာက စိုးရိမ်စရာပါ။ နောက်ဆုံးသိရရေ သတင်းအရ ဆိုကေ အကူအညီပီးနိန်ကတ်တေ ပြည်တွင်းအဖွဲ့အစည်းတိက ကောင်းနည်းလားပျာယ်လို့ ဆိုပါရေ။ OCHA၏ ခန့်မှန်းချက်အရ အမှန်တကယ် လိုအပ်ငွေမှာ သန်းပေါင်း ၅၃ သန်း ဖြစ်ကေလေ့ လောလောဆယ်ထိ နိုင်ငံတကာက ဒေါ်လာ ၁၈ သန်းကို ကတိပြုလှူဒါန်းထားပြီးကေ ကုလသမဂ္ဂ ဗဟိုအရေးပေါ်ကူညီရေးရံပုံငွေထဲက သန်း ၆ သန်း၊ စုစုပေါင်း သန်း ၂၄ သန်းရာ ရထားပါသိရေ။ လိုအပ်ငွေ၏ ထက်ဝက်တောင် မပြည့်ပါသိ။

ရီ
လိုအပ်ချက်တိ အများကြီးထဲက အရေးအကြီးဆုံးကတော့ သောက်ရီသန့်ပဲ ဖြစ်ပါရေ။ သောက်ရီတွင်းတိကို ညစ်ညမ်းရီဝင်လားလို့ သောက်သုံးရီအခက်အခဲတိကလည်း ဟိတုန်းပါသိ။ ကျွမ်းကျင်သူတိ၏ အဆိုအရ လူတစ်ယောက်ရေ အစာမစားပဲ ရက် ၅၀ တိုင်အောင်နိန်နိုင်ကေလေ့ ရီမသောက်ပဲ ၃၊ ၄ရက်တောင် မနိန်နိုင်လို့ဆိုပါရေ။ ဇာဖြစ်လို့လဲဆိုကေ လူခန္ဓာကိုယ်၏ ၅၀ ရာခိုင်နှုန်းကျော်ရေ ရီဓာတ်တိနန့် ဖွဲ့စည်းထားလို့ပါ။ တခြားအာဟာရတိနန့် အလီးချိန်အားဖြင့် ယှဉ်လိုက်ကေ ရီက လူ့ခန္ဓာကိုယ်အတွက် အလိုအပ်ဆုံးအရာပါ။ နိန်စိုင် အသက်ရှုခြင်း၊ ချွေးထွက်ခြင်း၊ ကျင်ကြီးကျင်ငယ်စွန့်ခြင်းတိက ခန္ဓာကိုယ်ထဲမှာဟိရေ ရီဓာတ်တိကို လျော့ပါးစီပါရေ။ ယင်းအတွက်နန့် ကုန်လားခရေ ရီဓာတ်ကို ပြန်လည်အားဖြည့်ပီးဖို့ လိုအပ်ပါရေ။

ရီဓာတ်မလုံလောက်ပဲ ခန္ဓာကိုယ်ထဲကနိန် ရီဓာတ် ၅ရာခိုင်နှုန်းထိ ဆုံးရှုံးလားခကေ အောက်ပါလက္ခဏာတိကို ခံစားလာနိုင်ပါရေ။
၁။ နှလုံးခုန်မြန်လာခြင်း၊
၂။ အသက်ရှူမြန်လာခြင်း၊
၃။ ချွေးထွက်နည်းခြင်း၊
၎။ သီး (ဆီး) နည်းခြင်း၊
၅။ ခန္ဓာကိုယ် အပူချိန်တက်လာခြင်း၊
၆။ အလွန်အမင်း နွမ်းနယ်လာခြင်း၊
၇။ ကြွက်သားတိ ကိုက်လာခြင်း၊
၈။ ဂေါင်းကိုက်ခြင်း၊ ဂေါင်းမူးခြင်း၊
၉။ ခြီလက်များမှာ စူးစူးရှရှ ခံစားမှုတိ ရလာခြင်း ရို့ဖြစ်ပါရေ။

ရီဓာတ် ၁၀ ရာခိုင်နှုန်း ဆုံးရှုံးလားကေတော့ခါ အောက်ပါလက္ခဏာပြင်းတိကို ခံစားလာနိုင်ပါရေ။
၁။ အော့အန်ခြင်း၊
၂။ ကြွက်သားများ အလွန်အမင်းကိုက်ခဲလာခြင်း၊
၃။ အရီပြား ကွဲခြင်း၊
၎။ နှလုံးခုန်နှုန်း အလွန်အမင်းမြန်လာခြင်း၊
၅။ အမြင်အာရုံ မှေးမိန်လာခြင်း၊
၆။ သီးပေါက်လျှင် နာကျင်လာခြင်း၊
၇။ စိတ်ရှုပ်လာခြင်း၊
၈။ အသက်ရှူရ ခက်လာခြင်း၊
၉။ တ ခြင်း (seizures)
၁၀။ ရင်ဘတ်နန့် ၀မ်းနာခြင်း
၁၁။ သတိမေ့ခြင်း။

လွန်ခရေ အပတ်ကတော့ခါ မိုး ၃ ရက်လောက်ရွာခလို့ ရီကိစ္စနည်းနည်း သက်သာလားခပါရေ။ ရီမပြတ်လားစီဖို့ အတွက် အဖွဲ့တစ်ချို့ကလည်း အ၀ီစိတွင်းတူးဖို့၊ ဟိရေ ရီကန်တိ ညစ်ပတ်နိန်စွာကို ပြန်ပျင်ဖို့ လုပ်နိန်ကတ်ပါရေ။ အ၀ီစိရီကလည်း ပေ ၂၀၀ ထိတူးကေတောင် ရီက ကောင်း မသန့်လို့ စက်ယန္တရားတိနန့် ပိုအနက် တူးနိုင်ဖို့ လိုရေလို့ ပြည်တွင်းကူညီရေးအသင်းဝင်တစ်ယောက် အပြောအရ သိရပါရေ။ နွေရာသီဆိုကေ ရီယှားပါးမှု ပိုဆိုးနိုင်လို့ အ၀ီစီတွင်းတိကို အချိန်မှီတူးနိုင်ကေ နောင်ရေရှည်အတွက်လည်း အဆင်ပြေလားဖို့ ဖြစ်ပါရေ။

အစားအစာ
သြစတြေးလျ၊ အမေရိက စရေ ဗမာအစိုးရနန့် ပနံမသင့်ရေ နိုင်ငံတိက ကမ္ဘာ့စားနပ်ရိက္ခာအဖွဲ့ WFP (World Food Program)ကနိန်တဆင့် လှူဒါန်းဖို့လို့သိရပါရေ။ မတ်ထရစ်တန် ၃၃၀၀ ဟိရေ အစားအသောက် လူသုံးကုန်တိကို ဖြန့်ဖြူးပီးနိန်ရေလို့ OCHA အစီရင်ခံစာက ဆိုပါရေ။ နောက်ထပ် အစားအစာ မတ်ထရစ်တန် ၂၇၀၀ ကို စစ်တွေ၊ မြေပုံ၊ ကျောက်ဖြူ မြို့တိကို လောလောဆယ် တင်ပို့ဖို့ဟိပြီးကေ မုန်တိုင်းခံပြည်သူတိအတွက် မျှဝီပီးလာဖို့လို့ သိရပါရေ။ တခြားဒေသခံအဖွဲ့အစည်းတိကလည်း ပံ့ပိုးကူညီနိန်ကတ်ပါရေ။ ယင်းအတွက်နန့် မုန်တိုင်းသင့် ပြည်သူတိအတွက် အစားအသောက်ကတော့ လူတိုင်းအတွက် မလုံလောက်သိကေလေ့ လောလောဆယ်အထိတော့ နိန်သာထိုင်သာ အခြေအနေမှာ ဟိနိန်ပါရေ။

နိန်ထိုင်ရေး
OCHA အစီရင်ခံစာအရ တာပေါလိမ်အဟတ်ပေါင်း ၉၃၀၀ ကျော်၊ ခြင်ထောင်ပေါင်း ၅၀၀၀ ကျော်၊ စောင်ပေါင်း ၆၀၀၀ကျော် နန့် တခြားအသုံးအဆောင်ပစ္စည်းတိကို ပီးထားရေလို့ဆိုပါရေ။ ယေကေလေ့ ယင်းချင့်ရေ တကယ်တမ်း အိုးမဲ့အိမ်မဲ့ဖြစ်တေ လူ ၁ သိန်း ၂ သောင်းနန့် ယှဉ်လိုက်ကေ မပြောစလောက်ပဲ ဟိပါသိရေ။
တချို့က အဖွဲ့အစည်းတိက ယာယီတဲတိ ထိုးပီးပါရေလတ်။ တချို့ကလည်း လဟာပြင်မှာ တာပေါ်လင်မိုးလို့နိန်ကတ်ရတုန်းပါသိ။ နိရဉ္စရာသတင်းဌာနနန့် မိန်းမြန်းစွာမှာ ဦးအေးသာအောင်က တချို့ရွာသားတိရေ ပီးရေ တဲတိကို မယူဝံ့ကြကြောင်း၊ ဇာဖြစ်လို့လဲဆိုကေ ယင်းတဲကို ပြန်အပ်ကတ်ရဖို့ဖြစ်ကြောင်း၊ တကယ်လို့ တစ်ခုခု ဥပမာ မီးစကျလို့ အပေါက်ချေ ပေါက်လားကေ လျော်ကြေးပီးကတ်ရဖို့ဖြစ်ကြောင်း ရွာသားတိကို ကိုးကားလို့ ပြောပြလားခပါရေ။

လီဘေးဒုက္ခသည်တိကို အများကြီးအကူအညီပီးနိန်ရေ ရခိုင်အဖွဲ့အစည်းတစ်ခုကလည်း တာပေါလိမ်ဟတ်တိကို ၀ီပီးကြောင်း၊ တခြားလူတိကို တာပေါလိမ်ကို မလိုချင်လို့ ဒေသထွက် အုန်းတိ၊ ဓနိတိ ၀ယ်ဖို့ ဖဲ့ချာပီးကတ်ကြောင်း ယင်းအဖွဲ့က ပြောပြပါရေ။ အုန်းတိ၊ ဓနိတိ ရောင်းလိုက်တေ ဒေသခံတိမှာလည်း ဖဲ့ချာ ရလားလို့ နှစ်ဦးနှစ်ဖက် အဆင်ပြေလားကတ်ကြောင်း ပြောပြပါရေ။ တချို့ကလည်း မိမိအိမ်ကို ကိုယ်ထူကိုယ်ထ ပြန်ပျင်ဖို့ကြိုးစားတုန်းသိလို့လည်း ကြားသိရပါရေ။

နဂိုအခြေအနေကို ရောက်ဖို့အတွက် အချိန်ယူပြီးကေ ဆက်လက်ပံ့ပိုးကြရဖို့ ဖြစ်ပါရေ။ နဂိုကတည်းက တစ်နိန့်စားဖို့ကို မနည်းယှာလို့ ရုန်းကန်နိန်ကတ်ရစွာမှာ အဂုကိုယ့်ဂေါင်းထက်က ခေါင်းမိုးလည်းပြောင်၊ ကိုယ့်ဘေးက နံရံလေ့ ပြောင်၊ အားလုံးပြောင်လားကတ်ပါပျာယ်။

မြန်မာ့အလင်း သတင်းစာ အရဆိုကေ နပတ တိုင်းမှူး စိုးသိန်းရေ မင်းပြားကို ရောက်လာပါရေလတ်။ ယေကေလေ့ လီဘေးသင့်ပြည်သူတိကို ကူညီရေ သတင်းတစ်ခုလေ့ မပါပါ။ အေလောက်ဒုက္ခရောက်နိန်စွာကိုတောင် 'ဒေသဖွံ့ဖြိုးရေး လုပ်ငန်းများကို စစ်ဆေး'ဆိုရေ ဂေါင်းစိုင်နန့် ၀ါဒဖြန့်ကောင်းနိန်တုန်း။ တကယ်တမ်းဖြစ်သင့်စွာက 'ဒေသပြန်လည်ထူထောင်ရေးလုပ်ငန်းများကို စစ်ဆေး'လို့ရာဖြစ်သင့်ပါရေ။ ပြည်လည်ထူထောင်ရေးလုပ်ငန်းတိကို မကြည့်ခပုံပေါက်ပါရေ။ နဂိုကတည်းက မဖွံဖြိုးစွာမှာ အဂု ဂျီးကပ်လမွဲဖြစ်နိန်ကတ်ရပါပျာယ်။ ယင်းချင့်ကိုတောင် မျက်နှာပြောင်တိုက်လို့ ဒေသဖွံ့ဖြိုးရေးဆိုပြီးကေ ၀ါဒဖြန့်ကောင်းတုန်းပါသိ။

ကျန်းမာရေး
မုန်တိုင်းကျပြီးစ အောက်တိုဘာ ၂၂ ရက်ကနိန် အောက်တိုဘာလ ၂၄ ရက်နိန့် လူနာပေါင်း အယောက် ၂ သောင်းဝန်းကျင်ကို ကုသပီးခရေလို့ ကျန်းမာရေးလုပ်ငန်းရပ်တိကို လုပ်ဆောင်နိန်ရေ အဖွဲ့အစည်းတစ်ခု၏ စစ်တမ်းအရ သိရပါရေ။ ယင်းအထဲက အများစုရေ ပွန်းပဲ့ခြင်း၊ မျက်စိနာခြင်း၊ ၀မ်းပျက်ခြင်း စရေ ရောဂါလက္ခဏာတိကို ခံစားနိန်ရရေလို့ ဆိုပါရေ။ UNFPA-MMAအဖွဲ့က ကျန်းမာရေးဝန်ထမ်းတိက မြေပုံမြို့မှာ ဆေးခန်းဖွင့်လှစ်ပြီးကေ ကုသပီးနိန်ပါရေ။ ယင်းအဖွဲ့ကပျာယ် တခြား မြေပုံမြို့နယ်က ရွာ ၂၈ ရွာကို လှည့်ပြီးကေ ဆေးဝါးကုသမှုတိကို လုပ်ပီးပါရေ။ UNFPA-MSI အဖွဲ့ကလည်း ကျောက်ဖြူမြို့နယ်က ရွာ ၁၂ ရွာကို လှည့်လည် ကုသပီးပါရေ။ ယင်းအဖွဲ့တိကပဲ တခြားသန့်စင်ရေး ပစ္စည်းတိ၊ ဆေးဝါးတိကို ပီးခပါရေ။ အဂုကျလာရေ ကုလသမဂ္ဂဗဟိုရံပုံငွေနန့်ဆိုကေ ယင်းလှည့်လည်ကုသရေးလုပ်ငန်းတိကို ဆက်လက် လုပ်ဆောင်လားနိုင်ဖို့လို့လည်း သိရပါရေ။ ယင်းပိုင်ပျာယ် တခြားအဖွဲ့အစည်းတိကလည်း ရဟိရေ အချက်အလက်တိကို လိုက်လို့ အရေးကြီးရေ ရွာတိကို ဦးစားပီး ကူညီပီးနိန်ကတ်ပါရေ။ အထူးသဖြင့် မုန်တိုင်းခံပြည်သူတိထဲက အချေတိ၊ ကိုယ်ဝန်ဆောင်တိကိုလည်း လိုအပ်တေ ကျန်းမာရေးစောင့်ရှောက်မှုတိကို တတ်နိုင်သလောက် ကူညီပီးနိန်ရေလို့ ဆိုပါရေ။ ယေကေလေ့ လိုအပ်ချက်နန့် ပီးနိုင်ရေ အကူအညီက မမျှဖြစ်နိန်တုန်းလို့ ဆိုပါရေ။

ကိုယ်ခန္ဓာကျန်းမာရေးကတော့ လတ်တလော ကုသလို့ရကေလေ့ စိတ်ပိုင်းဆိုင်ရာ ကျန်းမာရေးကတော့ အချိန်ယူရပါဖို့။ လူတိုင်းရေ သဘာဝဘေးအန္တရာယ်တစ်ခု ကျရောက်တိုင်း အလွန်အမင်းစိတ်ဖိစီးမှုဒဏ်ကို ခံရတတ်ပါရေ။ အထူးသဖြင့် မိမိချစ်ခင်တွယ်တာရေ လူတစ်ယောက်ယောက်ဆုံးရှုံးလားကေ ရူးမတတ်ခံစားကတ်ရပါဖို့။ ယင်းခံစားရရေလူတိထဲမှာတောင် အမျိုးသမီးနန့် အရွယ်မရောက်သိရေ အချေတိက ပိုစိုးရိမ်ရပါရေ။ ယင်းလူတိကို နှစ်သိမ့်ပီးဖို့ အနားမှာ ခြံရံအားဖြည့်ပီးဖို့ ဆွေမျိုး၊ သငယ်ချင်းတိ လိုအပ်ပါရေ။ ရေရှည်ကြည့်ရှုစောင့်ကြည့်ပီးဖို့ လိုအပ်ပါရေ။

၁၉၈၈ ခုနှစ်က နယူးဇီလန်နိုင်ငံမှာလည်း ဘိုလာ(Bola) ဆိုရေ ဆိုင်ကလုန်းတစ်ခု တိုက်ခပါရေ။ နိုင်ငံ၏ စိုက်ပျိုးကျေးလက်ဒေသတိကို ဒုက္ခအကြီးအကျယ်ပီးခပါရေ။ မုန်တိုင်းတိုက်ပြီးလို့ ၅ နှစ်အကြာမှာ မုန်တိုင်းခံပြည်သူတိကို ပြန်လည်စစ်ဆေးကြည့်ရေခါ ယင်းအထဲက ၁၂ ရာခိုင်နှုန်းရေ ဖြစ်ရပ်လွန်စိတ်ဖိစီးမှု လက္ခဏာရပ်တိကို ပြသနိန်ရေလို့ဆိုပါရေ။ ၁၉၈၆ ခုနှစ်က ပြုလုပ်ခရေ လေ့လာချက်တစ်ခုအရလည်း ပစ္စည်းဥစ္စာဆုံးရှုံးမှု၊ မိမိချစ်ခင်သူ သီဆုံးမှုတိရေ ခံစားရရေ အာရုံကြော ချို့ယွင်းအားနည်းလာမှု၊ မုန်တိုင်းလွန်စိတ်ဖိစီးမှုတိနန့် တိုက်ရိုက်ဆက်စပ်နိန်ရေလို့ ဆိုပါရေ။ နဂိုအခြေအနေကို ပြန်ရောက်ဖို့အတွက် စိတ်ပိုင်းဆိုင်ရာ အားပီးမှု၊ လူကျင့်ဝတ်ဆိုင်ရာ ထောက်ပံ့မှု (moral support)တိအပေါ်အများကြီး မူတည်ကြောင်း ဖော်ပြထားပါရေ။ လူပုဂ္ဂိုလ်ကိုလိုက်လို့ ယင်းဖိစီးမှုကို တုန်ပြန်စွာ၊ ပြန်လည် နလံထူစွာ ကလည်း ကွာခြားတတ်ပါရေ။ ယင်းအတွက်ကြောင့် ရေရှည်စောင့်ကြပ်ကြည့်ရှုလားဖို့ လိုအပ်ပါရေ။

ပညာရေး
အစိုးရဘားဂျတ်၏ ၃ ရာခိုင်နှုန်းလောက်ကိုပဲ ပညာရေး၊ ကျန်းမာရေးအတွက် သုံးရေ ဗမာနိုင်ငံမှာ အဂုဆိုကေ အနာမှာ ဒုတ်ကျ ဖြစ်ရပါပျာယ်။ စာသင်ကျောင်းတိ၏ ၅၆ ရာခိုင်နှုန်းပျက်စီးလားရေလို့ သိရပါရေ။ အတန်းတင်စာမေးပွဲကြီးကလည်း နောက်နှစ်လလောက်ဆိုကေ ကျပါဖို့ပျာယ်။ မုန်တိုင်းခံပြည်သူတိအထဲမှာ အစိုးရိမ်ရဆုံးက အထက်မှာ ပြောခရေပိုင် အချေတိနန့် ကိုယ်ဝန်ဆောင်မိခင်တိပါ။ အချေအရွယ်မှာ အေပိုင် ဘေးအန္တရာယ်ကြီးတစ်ခုနန့် ကြုံလိုက်ရကေ ယင်းအချေတိစိတ်ထဲမှာ trauma (လျှပ်တပြက်နာကျင်တုန်လှုပ်စိတ်) ၀င်လားတတ်ပါရေ။ ယင်းပိုင်အချေတိကို ကူညီဖို့က သူ့သငယ်ချင်းတိနန့် ပြေးလွှားကဇတ်ပြီးကေ traumaကို မိန့်လားအောင် လုပ်ပီးစွာက အကောင်းဆုံးပါ။ ယင်းပိုင်လုပ်ပီးနိုင်ဖို့အတွက် ကျောင်းအဆောက်အအုံတိက အရေးကြီးပါရေ။

လောလောဆယ်မှာ UNICEFနန့် အစိုးရ ပညာရေးဌာနရို့ ပူးပေါင်းပြီးကေ ယာယီစာသင်နိန်ရာ ၁၅၀ ကို ပြုလုပ်ပီးထားရေလို့ OCHAအစီရင်ခံစာအရ သိရပါရေ။ နိုင်ငံတကာ အန်ဂျီအိုတိကလည်း စာသင်ကျောင်း ၄၀ကို ဆောက်လုပ်ဖို့ အစိုးရပါးက ခွင့်ပြုချက် ရထားပျာယ်လို့လည်း သိရပါရေ။ ရခိုင်သဟာယအသင်းကလည်း အစိုးကျောင်းမဟုတ်တေ အပြင်ကျောင်းတိကို ရွာ ၆ ရွာမှာ ဆောက်လုပ်ဖို့ စီစိုင်နိန်ရေလို့လည်း သိရပါရေ။ ယူနီဆက်ဖ်နန့် အစိုးရပေါင်းပြီးကေ စိတ်ပိုင်းလူမှု သင်တန်းတိကို အစိုးရကျောင်းနန့် ဘုန်းတော်ကြီးသင်ကျောင်းတိက ဆရာတိကို သင်ကြားပို့ချလားဖို့လို့လည်း သိရပါရေ။

အပြင်ကလူတိ ဇာလုပ်ကတ်ဖို့လဲ
ပြည်ပကို ရောက်ဟိနိန်ရေ ရခိုင်သူရခိုင်သားတိကတော့ တတ်နိုင်သလောက် အေကိစ္စကို ကမ္ဘာက မမိပပျောက်မဟိလားအောင် ကြိုးစားကတ်ရဖို့ဖြစ်ပါရေ။ ဂီရိသတင်းကို စောင့်ကြပ်မျှဝီပီးလားကတ်ရဖို့ ဖြစ်ပါရေ။ ရံပုံငွေရအောင် ရံပုံငွေရှာပွဲ၊ ဈီးရောင်းပွဲတိ ထပ်လို့ လုပ်လားကတ်ရဖို့ဖြစ်ပါရေ။ လိုအပ်တေ ငွေ၏ ထက်ဝက်လောက်ပဲ ရသိရေအတွက်ကြောင့် တခြားနိုင်ငံတိက လှူလာအောင် တိုက်တွန်းကတ်ရဖို့ ဖြစ်ပါရေ။ အခုလောလောဆယ်ထိ ကမ္ဘာ့အချမ်းသာဆုံးနိုင်ငံထဲက တစ်နိုင်ငံလည်းဖြစ်တေ၊ အာသျှဒေသမှာ အလှူအတန်းအကြီးဆုံးလည်း ဖြစ်တေ ဂျပန်က ဒေါ်လာ ၅ သိန်းပဲ လှူထားသိရေလို့ သိရပါရေ။ ယင်းချင့်ရေ တခြား သြစတြေးလျ၊ အမေရိကရို့နန့် ယှဉ်လိုက်ကေ ကောင်းနည်းလွန်းနိန်ပါရေ။ ယင်းအတွက်ကြောင့် ဂျပန်အစိုးရ၊ နိုင်ငံခြားရေးဝန်ကြီးဌာနကို စာပို့ကတ်ရပါဖို့။ ယင်းပိုင်ပျာယ် နော်ဝေး၊ ဆွီဒင်စရေ နိုင်ငံတိကိုလည်း စာပို့ကတ်ရပါဖို့။ သူရို့ကူညီကေအမြတ်၊ မကူညီကေ အရင်းပါ။

ချစ်စရာ့ ရက္ခိတစိတ်နန့် မုန်တိုင်းခံပြည်သူတိအတွက်ဆိုရေ ဦးတည်ချက်ကို အရင်းတည်ပနာ အားလုံးဝိုင်းဝန်းပြီးကေ ဆက်လက်ကြိုးစားကြည့်ကတ်ပါမေ။ ဒုက္ခရောက်ပြည်သူတိကို ကူညီသူအားလုံး စိတ်ကျန်းမာ၊ ကိုယ်ချမ်းသာကတ်ပါစီ။

မှီငြမ်း
၁။ ပြည်တွင်းမှ ကူညီနိန်ကတ်သူတိ (Inside Sources)
၂။ Myanmar Information Management Unit (MIMU), http://www.themimu.info, accessed on December 24, 2010
၃။ Office for the Coordination of Humanitarian Affairs, United Nations, http://girirelief.net/wp-content/uploads/2010/12/OCHA-Report-10-November-30-2010.pdf, accessed on December 18, 2010
၎။ Mayo Clinic, Nutrition and Healthy Eating, http://www.mayoclinic.com/health/water/NU00283, accessed on December 22, 2010
၅။ Symptoms of Dehydration ,http://www.symptomsofdehydration.com/, accessed on December 22, 2010
၆။ Insel. Paul M.; Roth, Walton T.; Core Concepts in Health with Additional Readings from Georgia Institute of Technology, 10th Edition, Mc Graw Hill, New York, 2008.
၇။ Narinjara, Interview with General Secretary of Arakan League for Democracy (ALD) On His Recent Trip to the Affected Areas of Cyclone Giri and His Assistance to the Victims, http://www.narinjara.com/details.asp?id=2813, accessed on December 21, 2010